அமெரிக்கா மற்றும் ரஷ்யா ஆகிய இரு நாடுகளும் இந்தியாவிற்கு தங்களின் மேம்பட்ட போர் விமானங்களை விற்பனை செய்ய ஆர்வம் காட்டி வருகின்றன. இந்திய பிரதமர் நரேந்திர மோடி, அமெரிக்கா பயணத்தின் போது, அதிபர் டொனால்ட் டிரம்பை சந்தித்து பேச்சுவார்த்தை நடத்தியுள்ளார். இந்த சந்திப்பின் போது, அமெரிக்காவின் லாக்ஹீட் மார்ட்டின் நிறுவனம் தயாரித்த F-35 போர் விமானங்களை வாங்கும்படி இந்தியாவிடம் கோரிக்கை விடுக்கப்பட்டதாக தகவல்கள் வெளியாகியுள்ளன.
இதற்கு மாறாக, ரஷ்யாவின் சுகோய் நிறுவனம் தயாரித்துள்ள Su-57E போர் விமானங்களையும் இந்தியா வாங்க முன்வந்துள்ளது. இரு நாடுகளும் தங்களது போர் விமானங்களை இந்தியாவிற்கு விற்பனை செய்யும் முயற்சியில் தீவிரமாக உள்ளன. இந்நிலையில், இந்தியா எந்த விமானத்தை தேர்வு செய்யும் என்பது எதிர்வரும் நாட்களில் தெரிய வரும்.
அமெரிக்காவின் F-35 போர் விமானம் லாக்ஹீட் மார்ட்டின் நிறுவனத்தால் தயாரிக்கப்பட்டு, ஒற்றை எஞ்சினுடன் இயங்கும் விதமாக வடிவமைக்கப்பட்டுள்ளது. இது வானில் இருந்து வானிலும், தரையில் உள்ள இலக்குகளையும் தாக்கும் திறன் கொண்டதாகும். உளவு நடவடிக்கைகளுக்காகவும் இதைப் பயன்படுத்த முடியும். F-35A, F-35B, F-35C என மூன்று வகைகளில் இது வடிவமைக்கப்பட்டுள்ளது. இது ஒரு மணி நேரத்திற்கு 1931 கிலோமீட்டர் வேகத்தில் (Mach 1.6) செல்லும் திறன் கொண்டது. மேலும், 1500 கிலோமீட்டர் தொலைவில் இருக்கும் இலக்குகளை தாக்கும் திறனும் கொண்டதாக உள்ளது. எதிரிகள் பயன்படுத்தும் ரேடார் அமைப்புகளை எளிதில் மழுங்கடிக்கும் தொழில்நுட்பத்துடன் இது உருவாக்கப்பட்டுள்ளது. இந்த விமானத்தின் விலை சுமார் 40 மில்லியன் அமெரிக்க டாலராகும்.
ரஷ்யாவின் Su-57E போர் விமானம், இரட்டை எஞ்சின்களுடன் இயங்கும் ஐந்தாம் தலைமுறை விமானமாகும். இது வானில் இருந்து வானிலும், தரையில் இருக்கும் இலக்குகளையும் தாக்கும் திறன் கொண்டதாக வடிவமைக்கப்பட்டுள்ளது. ஒரு மணி நேரத்தில் 1350 கிலோமீட்டர் (Mach 1.8) வேகத்தில் பறக்கும் திறன் பெற்றுள்ளது. இது அதிக நேரமும், கடுமையான காலநிலையிலும் செயல்படக் கூடியதாக வடிவமைக்கப்பட்டுள்ளது. இந்த விமானத்தின் விலை சுமார் 35 மில்லியன் அமெரிக்க டாலராக உள்ளது.
இந்தியா தற்போது தனது பாதுகாப்பு உபகரணங்களை உள்ளூர் தயாரிப்பு மூலம் உருவாக்கும் நோக்கில் செயல்பட்டு வருகிறது. இந்தியாவின் ராணுவ தேவைகளை பூர்த்தி செய்யும் வகையில், சொந்தமாக ஐந்தாம் தலைமுறை போர் விமானங்களை உருவாக்கும் திட்டத்திலும் ஈடுபட்டுள்ளது. எனவே, தற்போதைக்கு வெளிநாட்டு போர் விமானங்களை வாங்கும் முடிவை இந்திய அரசு எடுக்கும் வாய்ப்பு குறைவாகவே உள்ளதாக எதிர்பார்க்கப்படுகிறது.
