பழைய ஓய்வூதியத் திட்டத்தை அமல்படுத்தும் வரை போராட்டம் தொடரும் என சம்மேளனம் தகவல்

சென்னை: அரசு ஊழியர்களின் முதியோர் பாதுகாப்புக்கு பழைய ஓய்வூதியத் திட்டம் உறுதுணையாக இருக்கும் என்பதால், மீண்டும் பழைய ஓய்வூதியத் திட்டத்தை அமல்படுத்தும் வரை அரசு ஊழியர்களின் போராட்டம் தொடரும் என அகில இந்திய பாதுகாப்பு ஊழியர் சம்மேளனம் தெரிவித்துள்ளது. இதுகுறித்து அகில இந்திய பாதுகாப்புப் பணியாளர் சம்மேளன பொதுச் செயலர் சி. ஸ்ரீகுமார் வெளியிட்ட செய்திக் குறிப்பு:-

புதிய ஓய்வூதியத் திட்டம் கடந்த 2004-ம் ஆண்டு ஜனவரி 1-ம் தேதி அமல்படுத்தப்பட்டது. இதற்கு மத்திய, மாநில அரசு ஊழியர்கள் அனைவரும் கடந்த 20-ம் தேதி முதல் எதிர்ப்பு தெரிவித்து வருகின்றனர்.

இந்நிலையில், ஒருங்கிணைந்த ஓய்வூதியத் திட்டத்தை மத்திய அரசு அறிவித்துள்ளது. இது புதிய ஓய்வூதியத் திட்டத்தின் சீர்திருத்தமாகும். மேலும் இந்த நியாயமற்ற ஒருங்கிணைந்த ஓய்வூதியத் திட்டம் அரசின் சாதனையாகக் கருதப்படுகிறது மத்திய அரசு அறிவித்துள்ள ஒருங்கிணைந்த ஓய்வூதியத் திட்டத்தில் குறைந்தபட்ச ஓய்வூதியம் ரூ.10 ஆயிரமாகவும், குடும்ப ஓய்வூதியம் ரூ.6 ஆயிரமாகவும் நிர்ணயம் செய்யப்படும்.

குறைந்தபட்சம் 25 ஆண்டுகள் பணிபுரிந்தால் அதற்கு முந்தைய 12 மாதங்களுக்கான சராசரி அடிப்படை ஊதியத்தில் 50 சதவீதம் ஓய்வூதியமாக வழங்கப்படும் என அறிவிக்கப்பட்டுள்ளது.

மேலும் 25 ஆண்டுகளுக்கு குறைவாக பணிபுரிபவர்களுக்கு விகிதாச்சாரப்படி ஓய்வூதியம் குறைக்கப்படும் என்றும் தெரிவிக்கப்பட்டுள்ளது. 25 ஆண்டுகள் பணிபுரிந்த பிறகு, பணியாளர் விருப்ப ஓய்வு பெற்றாலும், அவர் 60 வயது நிரம்பிய நாளில் இருந்தே அவருக்கு ஓய்வூதியம் கிடைக்கும். பழைய ஓய்வூதியத் திட்டத்தில் 10 ஆண்டுகள் பணியாற்றிய பிறகு, அவரது கடைசி மாத அடிப்படை ஊதியத்தில் 50 சதவீதம் ஓய்வூதியமாக கிடைக்கிறது.

மேலும், பழைய ஓய்வூதியத் திட்டத்தில், ஊழியர்களுக்கு வருங்கால வைப்பு நிதி (பிஎஃப்) உள்ளது. ஆனால் புதிய மற்றும் ஒருங்கிணைந்த ஓய்வூதியத் திட்டத்தில் வருங்கால வைப்பு நிதி இல்லை. மேலும், பழைய ஓய்வூதியத் திட்டத்தில் பல நன்மைகள் உள்ளன. பழைய ஓய்வூதியத் திட்டம், அரசு ஊழியர்கள் மற்றும் அவர்களது இறப்புக்குப் பிறகு அவர்களது குடும்பத்தினரின் முதியோர் பாதுகாப்புக்கு உறுதுணையாக இருக்கும்.

எனவே, பழைய ஓய்வூதியத் திட்டத்தை மீண்டும் அமல்படுத்தும் வரை அரசு ஊழியர்களின் போராட்டம் தொடரும் என்றார்.