திருவனந்தபுரம்: கேரளாவில் உள்ள பிரசித்தி பெற்ற கோவில்களில் குருவாயூர் கிருஷ்ணர் கோவில் குறிப்பிடத்தக்கது.
இங்கு தமிழகம், ஆந்திரா, கர்நாடகா உள்ளிட்ட பல்வேறு மாநிலங்களில் இருந்து தினமும் பக்தர்கள் வந்து தரிசனம் செய்கின்றனர். இக்கோயிலில் முகூர்த்த நாட்களில் ஏராளமான திருமணங்கள் நடைபெறுவது வழக்கம்.
பெரும்பாலான திருமணங்கள் ஆகஸ்ட் மற்றும் செப்டம்பர் மாதங்களில் நடக்கும். ஆகஸ்ட் 21, 2022 அன்று குருவாயூர் கோவிலில் 248 திருமணங்கள் நடந்தன. இதுவே இதுவரை எட்டப்பட்ட அதிகபட்ச சாதனையாகும்.
ஆனால் இன்று இந்த சாதனை முறியடிக்கப்பட்டுள்ளது. குருவாயூர் கிருஷ்ணர் சன்னதி முன் இன்று ஒரே நாளில் 356 ஜோடிகளுக்கு திருமணம் நடந்தது.
கேரளாவின் பல்வேறு பகுதிகளைச் சேர்ந்தவர்கள் கடந்த பல மாதங்களாக செப்டம்பர் 8-ம் தேதி திருமணத்தை முன்பதிவு செய்யத் தொடங்கியுள்ளனர். இந்த எண்ணிக்கை நாளுக்கு நாள் அதிகரித்து வந்தது. கடந்த மாதம் மட்டும் திருமணமான தம்பதிகளின் எண்ணிக்கை 300ஐ தாண்டியது.
நேற்று வரை 356 திருமணங்கள் பதிவு செய்யப்பட்டுள்ளன. இதனால் திருமணங்கள் நடத்த கூடுதல் வசதி செய்து தர குருவாயூர் தேவசம் போர்டு முடிவு செய்தது. பொதுவாக முகூர்த்த நாட்களில் காலை 5 மணி முதல் திருமண சடங்குகள் தொடங்கும்.
ஆனால் இன்று அதிகாலை 4 மணி முதல் சடங்குகள் தொடங்கின. திருமணத்தை நடத்த கூடுதல் அர்ச்சகர்கள் நியமிக்கப்பட்டனர். கோவில் வளாகத்திற்குள் 6 திருமண மேசைகள் அமைக்கப்பட்டிருந்தன
. உடனே திருமணத்தை நடத்த அனைத்து ஏற்பாடுகளும் செய்யப்பட்டன. காலை 8 மணிக்குள் 186 ஜோடிகளுக்கு திருமணம் நடந்தது. ஒவ்வொரு ஜோடிக்கும் உறவினர்கள், புகைப்படக்காரர்கள், வீடியோகிராபர்கள் என 24 பேர் மட்டுமே அனுமதிக்கப்பட்டனர்.
மதியம் 12 மணிக்குள் அனைத்து திருமணங்களும் நடத்தப்பட்டன. இன்று ஒரே இடத்தில் 356 ஜோடிகளுக்கு திருமணம் நடந்ததால் குருவாயூர் நகரமே ஸ்தம்பித்தது. குருவாயூரில் இன்று எங்கு பார்த்தாலும் திருமணமான தம்பதிகள்தான்.
மணமக்கள், உறவினர்கள், நண்பர்கள் என ஆயிரக்கணக்கானோர் திரண்டதால் குருவாயூர் முழுவதும் இன்று கடும் போக்குவரத்து நெரிசல் ஏற்பட்டது. அனைத்து விடுதிகளும், ஓட்டல்களும் நிரம்பி வழிந்தன.
இன்று விடுமுறை தினம் என்பதால் குருவாயூர் கோயிலில் ஏராளமான பக்தர்கள் தரிசனம் செய்தனர். கூட்டம் அதிகமாக இருந்தாலும் இன்று குருவாயூரில் திருமணம் நடந்ததில் மிகுந்த மகிழ்ச்சி அடைவதாக திருமணமான தம்பதிகள் தெரிவித்தனர்.
