மஸ்கட்: வளர்ந்து வரும் ஆசிய கோப்பை அரையிறுதியில் இந்தியா 20 ரன் வித்தியாசத்தில் ஆப்கானிஸ்தானிடம் அதிர்ச்சி தோல்வியடைந்தது. வளர்ந்து வரும் அணிகளுக்கான ஆசிய கோப்பை கிரிக்கெட் (‘டி-20’) 6வது சீசன் ஓமனில் நடந்து வருகிறது. மஸ்கட்டில் நடந்த அரையிறுதியில் இந்தியா ‘ஏ’ மற்றும் ஆப்கானிஸ்தான் ‘ஏ’ அணிகள் மோதின.
டாஸ் வென்று முதலில் பேட் செய்த ஆப்கானிஸ்தான் ‘ஏ’ அணிக்கு ஜுபைத் அக்பரி (64), செடிகுல்லா அடல் (84), கரீம் ஜனத் (41) ஆகியோர் கைகொடுத்தனர். ஆப்கானிஸ்தான் ‘ஏ’ அணி 20 ஓவரில் 4 விக்கெட் இழப்புக்கு 206 ரன்கள் எடுத்தது.
இந்தியா ‘ஏ’ தரப்பில் ரசிக் சலாம் 3 விக்கெட்டுகளை வீழ்த்தினார். கடினமான இலக்கை விரட்டிய இந்தியா ‘ஏ’ அணியை பிரப்சிம்ரன் சிங் (19), அபிஷேக் சர்மா (7), கேப்டன் திலக் வர்மா (16) ஏமாற்றினர். ஆயுஷ் படோனி (31), நேஹல் வதேரா (20), நிஷாந்த் சிந்து (23) ஓரளவுக்கு உதவினார்கள்.
அபாரமாக பந்துவீசிய ரமன்தீப் சிங் 26 பந்துகளில் அரைசதத்தை கடந்தார். கடைசி ஓவரில் வெற்றிக்கு 30 ரன்கள் தேவைப்பட்டது. அப்துல் ரஹ்மான் பந்து வீசினார். இரண்டு பவுண்டரிகள் உட்பட 9 ரன்கள் எடுத்திருந்த ரமன்தீப் சிங் (64) கடைசி பந்தில் ஆட்டமிழந்தார். இந்தியா ‘ஏ’ அணி 20 ஓவரில் 7 விக்கெட்டுக்கு 186 ரன்கள் மட்டுமே எடுத்தது.
இந்தத் தொடரில் முதல்முறையாக இறுதிப் போட்டிக்கு முன்னேறி ஆப்கானிஸ்தான் ‘ஏ’ அணி வரலாறு படைத்தது. நாளை நடைபெறும் இறுதிப் போட்டியில் ஆப்கானிஸ்தான் ‘ஏ’ மற்றும் இலங்கை ‘ஏ’ அணிகள் மோதுகின்றன.
