சென்னை: துல்கர் சல்மானின் ‘லக்கி பாஸ்கர்’ திரைப்படம் நெட்பிளிக்ஸில் இந்திய அளவில் ட்ரெண்டிங்கில் தொடர்ந்து முதலிடத்தில் உள்ளது. அதுமட்டுமின்றி, 15 நாடுகளில் டாப் 10 பட்டியலில் தொடர்ந்து இடம்பெற்று வருகிறது துல்கர் சல்மான் நடிப்பில் வெங்கி அட்லூரி இயக்கத்தில் உருவாகியுள்ள படம் ‘லக்கி பாஸ்கர்’.
சித்தாரா எண்டர்டெயின்மெண்ட் தயாரிக்கும் இப்படத்தில் மீனாட்சி சவுத்ரி நாயகியாக நடிக்கிறார். ராம்கி முக்கிய வேடத்தில் நடிக்கிறார். ஜி.வி. பிரகாஷ் இப்படத்திற்கு இசையமைத்துள்ளார். தீபாவளியை முன்னிட்டு அக்டோபர் 31-ம் தேதி திரையரங்குகளில் வெளியான இப்படம் ரசிகர்கள் மத்தியில் நல்ல வரவேற்பை பெற்றது. தமிழகத்தில் குறைந்த எண்ணிக்கையிலான திரையரங்குகளில் வெளியான இப்படம் ரசிகர்களிடையே நல்ல வரவேற்பை பெற்றதால், திரையரங்குகளின் எண்ணிக்கையும், திரையிடல் எண்ணிக்கையும் தொடர்ந்து அதிகரித்து வந்தது.
இதன் விளைவாக ரூ. 70 கோடியில் உருவானதாக கூறப்படும் இப்படம் உலக அளவில் ரூ. 100 கோடி வசூலித்தது. இதையடுத்து படம் நெட்பிளிக்ஸ் தளத்தில் நவம்பர் 28-ம் தேதி வெளியானது. வெளியான நாளிலிருந்தே பலரும் படத்தைப் பாராட்டி வருகின்றனர். இதனால் இப்படம் இந்திய அளவில் ட்ரெண்டிங்கில் தொடர்ந்து முதலிடத்தில் உள்ளது. அதுமட்டுமின்றி, 15 நாடுகளில் டாப் 10 பட்டியலில் தொடர்ந்து இடம் பிடித்துள்ளது. முன்னதாக, நித்திலன் சுவாமிநாதன் இயக்கத்தில் விஜய் சேதுபதி நடிப்பில் வெளியான ‘மகாராஜா’ திரைப்படம் நெட்பிளிக்ஸில் தொடர்ந்து ட்ரெண்ட் ஆகி உலக அளவில் கவனத்தை ஈர்த்தது குறிப்பிடத்தக்கது.
