மும்பை: பிரபல பாலிவுட் நடிகர் சல்மான் கானுக்கு மீண்டும் ஒரு மிரட்டல் விடுக்கப்பட்டுள்ளதால் பரபரப்பு நிலவுகிறது. இன்று ஏப்ரல் 14 ஆம் தேதி, மும்பை போக்குவரத்து துறைக்கு வந்த ஒரு வாட்ஸ் அப் செய்தியில், அவரது இல்லத்தில் வெடிகுண்டு வைத்து கொலை செய்யப்படுவார் என்ற பயங்கரமான மிரட்டல் தெரிவிக்கப்பட்டது.
குறிப்பாக, “சல்மான் கானை அவரது வீட்டிலேயே கொன்றுவிடுவோம். வாகனத்தில் வெடிகுண்டு வைத்து தாக்குதல் நடத்தப்படும்” என அந்த அச்சுறுத்தல் செய்தியில் கூறப்பட்டுள்ளதாக போலீசார் தெரிவித்துள்ளனர். இது அவரது இல்லமான பந்த்ரா பகுதியில் கடந்த ஆண்டு நடத்தப்பட்ட துப்பாக்கிச் சூட்டுக்கு பிறகு மீண்டும் எழுந்துள்ள கவலையை அதிகரித்துள்ளது.
இந்த மிரட்டலின் அடிப்படையில், அடையாளம் தெரியாத நபர் மீது போலீசார் வழக்கு பதிவு செய்து தீவிர விசாரணை நடத்தி வருகின்றனர். மிரட்டல் வந்த பிறகு சல்மான் கானின் இல்லம் சுற்றியுள்ள பாதுகாப்பு பலமடங்காக அதிகரிக்கப்பட்டு, போலீசார் அதிகரித்த கண்காணிப்பை மேற்கொண்டு வருகின்றனர்.
இது முதல் முறை அல்ல. கடந்த சில ஆண்டுகளாகவே சல்மான் கானுக்கு லாரன்ஸ் பிஷ்னோய் கும்பலிடம் இருந்து தொடர்ந்து கொலை மிரட்டல்கள் வந்து கொண்டே இருந்தன. இக்கும்பலுடன் தொடர்புடைய நபர்கள் பலமுறை கைது செய்யப்பட்டிருந்தாலும், மிரட்டல்களுக்கு முடிவே இல்லாத நிலை தொடர்கிறது.
மும்பை போலீசாரின் பயங்கரவாத தடுப்பு பிரிவு (ஏ.டி.எஸ்.) மற்றும் சைபர் கிரைம் பிரிவும் இணைந்து அந்த வாட்ஸ்அப் மெசேஜ் எந்த எண்ணிலிருந்து வந்தது, யார் அனுப்பியிருக்கலாம் என்பதற்கான விசாரணையில் ஈடுபட்டுள்ளன.
இந்நிலையில், சல்மான் கானின் ரசிகர்கள் மற்றும் அவரின் பாதுகாப்புப் பிரிவு மிகுந்த பதட்டத்தில் உள்ளதாக தகவல்கள் தெரிவிக்கின்றன. நடிகர் சல்மானின் குடும்பத்தினரும் மிகவும் கவலையுடன் இருக்கின்றனர் என்றும் கூறப்படுகிறது.
சில ஆண்டுகளுக்கு முன்பு சைக்கிங் சம்பவங்கள் மற்றும் சூழ்நிலைகளால், சல்மான் கானுக்கு மத்திய அரசு ‘Y+’ நிலை பாதுகாப்பு வழங்கியிருந்தது. தற்போது மீண்டும் மிரட்டல்கள் அதிகரிக்கத் தொடங்கியுள்ளதால், அவருக்கான பாதுகாப்பு முறைகள் மேலும் வலுவாக்கப்படலாம் என எதிர்பார்க்கப்படுகிறது.
