புதுடில்லி: சுப்ரீம் கோர்ட் உத்தரவை தொடர்ந்து, நீட் தேர்வு மையம் வாரியான தேர்வு முடிவுகளை தேசிய தேர்வு முகமை இன்று (ஜூலை 20) வெளியிட்டது. நீட் தேர்வு முடிவுகளை exams.nta.ac.in என்ற இணையதளத்தில் பார்க்கலாம்.
இளநிலை மருத்துவப் படிப்புகளுக்கான பொது நுழைவுத் தேர்வான நீட், மே 5ம் தேதி நடைபெற்றது.இதில் 67 பேர் 720க்கு 720 மதிப்பெண்கள் பெற்று சாதனை படைத்துள்ளனர். இது சர்ச்சையை ஏற்படுத்தியது. தேர்வை ரத்து செய்யக்கோரியும், மறுதேர்வு நடத்தக் கோரியும், மோசடிகள் குறித்து நீதிமன்றக் கண்காணிப்பில் விசாரணை நடத்தக் கோரியும் வழக்குகள் தொடரப்பட்டன. இந்த வழக்குகளை உச்ச நீதிமன்ற தலைமை நீதிபதி சந்திரசூட் தலைமையிலான அமர்வு விசாரித்து வருகிறது.
உச்ச நீதிமன்ற உத்தரவு
தேர்வு முடிவுகள் ஜூன் 4ம் தேதி வெளியிடப்பட்டது. ஒவ்வொரு மாணவரும் தனது மதிப்பெண் என்ன என்பதை மட்டுமே தெரிந்து கொள்ள முடியும். மற்றவர்கள் எவ்வளவு மதிப்பெண் எடுத்தார்கள்? எந்த தேர்வு மையங்கள் அல்லது நகரங்கள் அதிக மதிப்பெண் பெற்றன என்பது தெரியவில்லை. இதனால், இன்று (ஜூலை 20) மதியம் 12:00 மணிக்குள் என்டிஏ மதிப்பெண் பட்டியல் உள்ளிட்ட முழு முடிவையும் இணையதளத்தில் வெளியிட வேண்டும் என உச்ச நீதிமன்றம் உத்தரவிட்டிருந்தது.
வெளியீடு
அதன்படி நீட் தேர்வு மையங்கள் வாரியான தேர்வு முடிவுகளை தேசிய தேர்வு முகமை இன்று வெளியிட்டது. நீட் தேர்வு முடிவுகளை https://exams.nta.ac.in/ என்ற இணையதளத்தில் பார்க்கலாம். இதன் மூலம், எந்தெந்த தேர்வு மையங்கள் அல்லது எந்தெந்த நகரங்களில் மோசடி நடந்துள்ளது என்பதை அறிய வாய்ப்பு கிடைக்கும்.
