மதுரை: பள்ளி பாடத்திட்டத்தில் நூலக பயன்பாட்டை சேர்க்க கல்வி நிறுவனங்களுக்கு அரசு சுற்றறிக்கை அனுப்ப உயர் நீதிமன்ற மதுரை கிளை உத்தரவிட்டுள்ளது. தமிழகத்தில் உள்ள நூலகங்கள் சட்ட விரோதமாக புத்தகங்கள் வாங்குவதைத் தடுக்கக் கோரி நாகர்கோவில் கிருஷ்ணன் உயர்நீதிமன்ற மதுரைக் கிளையில் மனு தாக்கல் செய்தார். நூலகங்களின் தரத்தை உயர்த்தவும், புத்தகங்கள் குறித்த விவரங்களை இணையதளங்களில் பதிவேற்றம் செய்யவும் உத்தரவிட வேண்டும் என கோரிக்கை விடுத்திருந்தார்.
மனுவை விசாரித்த தலைமை நீதிபதி ஆர்.மகாதேவன் (தற்போது உச்ச நீதிமன்ற நீதிபதி) மற்றும் நீதிபதி ஜி.ஆர்.சுவாமிநாதன் பிறப்பித்த உத்தரவு: புத்தகங்கள் வெளியிடப்பட்ட ஆண்டை மாற்றக் கூடாது என்பது விதி. அதுமட்டுமின்றி, பல ஆண்டுகளுக்குப் பிறகு பல்வேறு புத்தகங்கள் புதிய புத்தகங்களாக வெளியிடப்படுவதாக மனுதாரர் தெரிவித்துள்ளார். இந்த வழக்கு 2019 இல் தாக்கல் செய்யப்பட்டது. அரசு இதுவரை பதிலளிக்கவில்லை. கடந்த மார்ச் மாதம் வெளியிடப்பட்ட அரசாணை திறந்த புத்தகம் கொள்முதல் செய்ய வழிவகுத்தது. தலைப்பை அல்லது ஆசிரியரின் பெயரை மாற்றி புத்தகத்தை மறுவிற்பனை செய்வது சட்டவிரோதமானது.
பொது நூலகங்களுக்கு புத்தகங்கள் வாங்குவதை முறைப்படுத்த இந்த நீதிமன்றம் ஏற்கனவே உத்தரவிட்டுள்ளது. அந்த வகையில் தமிழகத்தில் உள்ள பொது நூலகங்கள் பொதுநலன் கருதி புத்தகங்களை வாங்காவிட்டால் அலெக்சாண்டிரியா நூலகத்திற்கு ஏற்பட்ட நிலையை சந்திக்க வேண்டியிருக்கும். புத்தகங்களை வெளியிடும் பதிப்பாளர்களை ஊக்குவிக்க வேண்டும்.
புத்தகம் படிக்கும் பழக்கத்தை சாமானியர்கள் மத்தியில் ஏற்படுத்த வேண்டும். புத்தகம் வாங்குவது மற்றும் புத்தகம் தொடர்பான விவரங்களை இணையதளத்தில் பதிவேற்றம் செய்ய வேண்டும். பள்ளி பாடத்திட்டத்தில் நூலக பயன்பாட்டை சேர்க்க கல்வி நிறுவனங்களுக்கு சுற்றறிக்கை அனுப்புமாறு அரசுக்கு நீதிபதிகள் உத்தரவிட்டுள்ளனர்.
