தோசை, இட்லி, சாதம் போன்ற வழக்கமான உணவுகளுக்கு தினமும் ஒரே மாதிரியான சட்னி வைக்கும்போது சலிப்பாகத்தான் இருக்கும். அதனால்தான் பலருக்கும் “இன்னைக்கு வேற ஏதாவது சட்னியா பண்ணலாமா?” என்ற எண்ணம் வரும். இந்த எண்ணத்திற்கு பதிலளிக்கவே, தற்போது ஒரு தனியார் தொலைக்காட்சியில் வைரலாகி வரும் நாவல் பழ சட்னி செய்முறையை இங்கே பகிர்கிறோம்.
முதலில் தேவையான பொருட்கள்: நன்கு பழுத்த நாவல் பழங்கள், துருவிய தேங்காய், பச்சை மிளகாய், கொத்தமல்லி இலை, சிறிதளவு வெல்லம் (அல்லது சர்க்கரை), சிறிது புளி (அல்லது எலுமிச்சை சாறு), மிளகு தூள், சீரகத் தூள், உப்பு மற்றும் தண்ணீர். முதலில் நாவல் பழங்களை நன்றாக கழுவி, அதன் சதையை மட்டும் எடுத்து, தோலை நீக்காமல் வைத்துக் கொள்ள வேண்டும். இந்த தோலே சட்னிக்கு ஒரு தனி சுவை தருகிறது.
பின்னர், மிக்ஸியில் நாவல் பழம், தேங்காய், பச்சை மிளகாய், கொத்தமல்லி, சர்க்கரை, புளி, மிளகு, சீரகத் தூள் மற்றும் கால் டம்ளர் தண்ணீரை சேர்த்து நன்றாக அரைக்க வேண்டும். சட்னி சீராக அரைக்கப்பட்டதும், தேவையான உப்பை சேர்த்து நன்கு கலக்கவும். அதற்குப் பிறகு, ஒரு சிறிய வாணலியில் எண்ணெய் ஊற்றி கடுகு, உளுந்து, சீரகம் மற்றும் கருவேப்பிலை போட்டு தாளித்து சட்னியில் சேர்க்க வேண்டும்.
இப்படி தயார் செய்யப்படும் நாவல் பழ சட்னி, சாதாரண சட்னிகளுக்கு மாற்றாக, உங்கள் உணவை மிகவும் வித்தியாசமான, சுவையான அனுபவமாக மாற்றும். இது இட்லி, தோசை, சாதம் மட்டுமல்ல, தயிர் சாதம் மற்றும் சிறுதானிய உணவுகளுடனும் மிகச் சிறந்த இணைவு தரும். ஒவ்வொரு சப்பிடத்திலும் ஒரு இனிமையும், மசாலாவும் கலந்து கிடைக்கும் இந்த சட்னி, உங்கள் சமையல் பட்டியலில் புதிய இடத்தைப் பிடிக்கப்போகிறது.
