புதுடில்லியில் வெளியிடப்பட்ட புதிய கருத்துக்கணிப்பின் படி, இன்றைய சூழலில் லோக்சபா தேர்தல் நடந்தால், பாஜ தலைமையிலான தேசிய ஜனநாயகக் கூட்டணி (என்டிஏ) 324 இடங்களில் வெற்றி பெறும் என கணிக்கப்பட்டுள்ளது. அதேசமயம், காங்கிரஸ் இடம்பெற்றுள்ள இண்டி கூட்டணிக்கு வெறும் 208 இடங்களே கிடைக்கும் என்று ஆய்வு கூறுகிறது.
2024ம் ஆண்டு நடைபெற்ற பொதுத் தேர்தலில் பாஜ 240 இடங்களில் வெற்றி பெற்றது. பெரும்பான்மைக்கு 32 இடங்கள் குறைவாக இருந்த நிலையிலும், பீகார் முதல்வர் நிதிஷ்குமார் மற்றும் ஆந்திர முதல்வர் சந்திரபாபு நாயுடுவின் ஆதரவு கிடைத்ததால், 293 இடங்களுடன் மூன்றாவது முறையாக ஆட்சியைப் பிடித்தது. அப்போதைய இண்டி கூட்டணி 234 இடங்களைப் பெற்றது.
இந்தியா டுடே மற்றும் சி-வோட்டர் மூட் இணைந்து, கடந்த ஜூலை 1 முதல் ஆகஸ்ட் 14 வரை நாடு முழுவதும் 2,06,826 பேரிடம் கருத்துக்கணிப்பு நடத்தியது. அதன்படி, பாஜ தலைமையிலான கூட்டணி 46.7% ஓட்டுகளைப் பெறும் நிலையில் இருப்பதாக கணிக்கப்பட்டுள்ளது. இது 2024ம் ஆண்டுடன் ஒப்பிடும் போது 2.7% அதிகரிப்பாகும். பாஜ மட்டும் 260 இடங்களில் வெற்றி பெறும் என்றும் எதிர்பார்க்கப்படுகிறது.
காங்கிரஸ் கட்சி, 2024 தேர்தலில் 99 இடங்களைப் பெற்ற நிலையில், தற்போது 97 இடங்களாக குறையும் என்று ஆய்வில் கூறப்பட்டுள்ளது. ஆப்பரேஷன் சிந்தூர், பீகார் மாநில தேர்தல் மாற்றங்கள் மற்றும் பல்வேறு தேசிய நிகழ்வுகளுக்குப் பிறகு பாஜவுக்கு ஆதரவு பெருகி வருவதாகவும் குறிப்பிடப்பட்டுள்ளது. இந்த முடிவுகள் அடுத்த தேர்தல் அரசியலில் பரபரப்பை ஏற்படுத்தியுள்ளது.
