ராஜ்கிர்: பீஹாரின் ராஜ்கிர் நகரில் நடைபெற்ற ஆசியக் கோப்பை ஹாக்கி தொடரின் 12வது சீசனில் இந்திய அணி சாம்பியன் பட்டத்தை கைப்பற்றியது. பைனலில் இந்தியா, நடப்பு சாம்பியன் தென் கொரியாவை 4–1 என்ற கோல் கணக்கில் வீழ்த்தியது.
இந்த போட்டியில் தில்ப்ரீத் 2 கோல்கள் அடிக்க, சுக்ஜித் மற்றும் அமித் ரோஹிதாஸ் தலா ஒரு கோல் அடித்து வெற்றியை உறுதி செய்தனர். தென் கொரியா அணி ஒரே ஒரு கோல் மட்டுமே அடித்து தோல்வியைச் சந்தித்தது.
இந்த தொடரில் இந்தியா, சீனா, மலேசியா, தென் கொரியா ஆகிய அணிகள் சூப்பர்-4 சுற்றுக்கு முன்னேறி போட்டியிட்டன. அதிலிருந்து இந்தியா மற்றும் தென் கொரியா பைனலில் மோதின. லீக் சுற்றிலேயே ஜப்பான், கஜகஸ்தான், வங்கதேசம், சீன தைபே அணிகள் வெளியேறின.
சாம்பியன் பட்டத்துடன், உலகக் கோப்பை ஹாக்கி தொடரில் பங்கேற்கும் தகுதியையும் இந்திய அணி பெற்றுள்ளது. இந்த வெற்றி இந்திய ஹாக்கி வரலாற்றில் மேலும் ஒரு முக்கிய சாதனையாக பதிவாகியுள்ளது.
