வாஷிங்டன்: உக்ரைன் அதிபர் ஜெலன்ஸ்கி, ரஷ்ய அதிபர் புடினுடன் சமாதான ஒப்பந்தம் செய்து போரை முடிக்க வேண்டும் என்று அமெரிக்க அதிபர் டிரம்ப் வலியுறுத்தியுள்ளார்.
இந்த விவகாரம் குறித்து நிருபர்களிடம் பேசிய டிரம்ப், “உச்சநீதிமன்ற வழக்கில் நாம் வெற்றி பெற்றால், அமெரிக்கா உலகின் சக்திவாய்ந்த நாடாக இருக்கும். வரிகளைப் பயன்படுத்தி ஏழு போர்களை முடித்துவிட்டேன். உக்ரைன்–ரஷ்யா போரை முடிக்க, ஜெலன்ஸ்கி ஒப்பந்தம் செய்ய வேண்டியது அவசியம்” என்று கூறினார்.
மேலும் அவர், “ஐரோப்பா ரஷ்யாவிலிருந்து கச்சா எண்ணெய் வாங்குவதை நிறுத்த வேண்டும். ரஷ்யாவுக்கு விதிக்கப்பட்ட தடைகள் போதுமானதாக இல்லை. நான் தயாராக இருந்தால் கூடுதல் பொருளாதார தடைகள் விதிக்கலாம். சீனாவுடனும் ஒரு வித்தியாசமான ஒப்பந்தம் செய்து கொண்டோம். அதனால் அமெரிக்காவுக்கும் சீனாவுக்கும் வலுவான வர்த்தக உறவு உருவாகும்” எனவும் தெரிவித்தார்.
டிரம்பின் இந்தக் கருத்து, உலகளவில் பெரும் விவாதத்துக்குள்ளாகியுள்ளது. உக்ரைன் மீது ரஷ்யா நடத்தி வரும் தாக்குதல்கள் தொடர்ந்து நடந்து வரும் நிலையில், சமாதான ஒப்பந்தம் எவ்வாறு சாத்தியம் என்பதை அரசியல் வட்டாரங்கள் கேள்வி எழுப்புகின்றன. இதே சமயம், ஐரோப்பா மற்றும் அமெரிக்காவின் நிலைப்பாட்டை பொருளாதார, அரசியல் நிபுணர்கள் ஆராய்ந்து வருகின்றனர்.
