இந்திய டெஸ்ட் அணி வரும் அக்டோபர் 2 ஆம் தேதி தொடங்கும் வெஸ்ட் இண்டீஸ் தொடரில் விளையாட உள்ளது. முதன்மை விக்கெட் கீப்பர் ரிஷப் பண்ட் காயம் காரணமாக விலகியதால், துருவ் ஜுரல் முதன்மை விக்கெட் கீப்பராக தேர்வு செய்யப்படுகிறார். தமிழ்நாட்டைச் சேர்ந்த நாராயணன் ஜெகதீசன் மாற்று விக்கெட் கீப்பராக வாய்ப்பைப் பெற உள்ளார்.
இந்த தொடரில் இந்திய அணியின் முன்னணி வேகப்பந்து வீச்சாளர் ஜஸ்பிரித் பும்ரா பங்கேற்க உள்ளார். பும்ரா தற்போது ஐக்கிய அரபு அமீரகத்தில் நடைபெறும் ஆசிய கோப்பை டி20 தொடரில் விளையாடி வருகிறார். வெஸ்ட் இண்டீஸ் டெஸ்ட் தொடருக்கு இடையில் மூன்று நாட்கள் மட்டுமே இடைவெளி இருப்பதால், அவருக்கு ஓய்வு வழங்கப்படுமா என்பது கேள்வி எழுந்தது. ஆனால் துணைப் பயிற்சியாளர் ரியான் டன் டஸ்கட்டே கூறியதாவது, பும்ரா தொடரில் விளையாடுவார்.
ராஜஸ்தானைச் சேர்ந்த இளம் இடது கை சுழற்பந்து வீச்சாளர் மானவ் சுதார், இந்திய டெஸ்ட் அணிக்கு அழைக்கப்பட அதிக வாய்ப்புள்ளதாக தகவல்கள் வெளியாகியுள்ளன. இப்போது நடைபெறும் இந்தியா ‘ஏ’ மற்றும் ஆஸ்திரேலியா ‘ஏ’ அணிகளுக்கு இடையேயான போட்டியில், மானவ் அபாரமான பந்துவீச்சால் அனைவரின் கவனத்தை ஈர்த்துள்ளார். 23 வயதான இவர் 23 முதல்தர போட்டிகளில் 95 விக்கெட்டுகளை வீழ்த்தியுள்ளார்.
மேலும், இந்திய அணியின் நட்சத்திர ஆல்-ரவுண்டர் ரவீந்திர ஜடேஜா, வெஸ்ட் இண்டீஸ் தொடருக்காக உடற்தகுதி தேர்வில் பங்கேற்று, மீண்டும் போட்டி கிரிக்கெட்டுக்குத் திரும்ப தயாராக உள்ளார். இங்கிலாந்துக்கு எதிரான தொடரில் ஜடேஜா சிறந்த பேட்டிங் திறனை வெளிப்படுத்தி ஒரு சதம் மற்றும் மூன்று அரைசதங்களுடன் விளையாடியுள்ளார்.
