புதுடில்லி: உலகளவில் மீன்பிடி துறையில் இந்தியா தற்போது இரண்டாம் இடத்தைப் பிடித்துள்ளது என மத்திய அரசு அறிவித்துள்ளது. இதன் மூலம் இந்தியா, உலக மீன் சந்தையில் சுமார் 8 சதவீத பங்கினை வழங்கி வருகிறது. இது இந்தியாவின் கடல் மற்றும் உள்நாட்டு மீன்பிடித் துறைகளின் வேகமான வளர்ச்சியை வெளிப்படுத்தும் முக்கிய சாதனையாகும்.
மத்திய மீன்வளத்துறை அமைச்சகம் வெளியிட்ட அறிக்கையில், கடந்த பத்து ஆண்டுகளில் அரசு பல்வேறு திட்டங்கள் மூலம் மீன்பிடி துறைக்காக ரூ.38,572 கோடி முதலீட்டினை ஒப்புதல் அளித்துள்ளதாக குறிப்பிடப்பட்டுள்ளது. இதன் விளைவாக, நாட்டின் மீன்பிடி உற்பத்தி 195 லட்சம் டன்னாக உயர்ந்துள்ளது. ஆண்டு வளர்ச்சி வீதம் 8.74 சதவீதம் என பதிவு செய்யப்பட்டுள்ளது. மேலும், மீன் பதப்படுத்தல் மற்றும் விநியோக மையங்கள் 34 இடங்களில் அமைக்கப்படவுள்ளன.
அதே சமயம், மீன்பிடி படகுகளில் ட்ரான்ஸ்பாண்டர் கருவிகள் இலவசமாக நிறுவப்பட்டுள்ளன. இதன் மூலம் மீனவர்களுக்கு நேரடி வானிலை எச்சரிக்கைகள், கடல் நிலை தகவல்கள், பாதுகாப்பு ஆலோசனைகள் போன்றவை அனுப்பப்படுகின்றன. இதற்காக மீனவர்கள் மத்திய அரசுக்கு நன்றி தெரிவித்துள்ளனர்.
இந்த வளர்ச்சி இந்தியாவின் கடல் பொருளாதாரத்தை வலுப்படுத்தும் ஒரு முக்கிய மாற்றமாகக் கருதப்படுகிறது. உலகளவில் மீன் ஏற்றுமதியில் இந்தியாவின் பங்கும் தொடர்ந்து அதிகரித்து வருவது, மீன்பிடித் துறையில் இந்தியா முன்னேறி வருவதை உறுதிப்படுத்துகிறது என நிபுணர்கள் கூறுகின்றனர்.
