இந்தியாவில் செயற்கை நுண்ணறிவு (ஏ.ஐ.) தொழில்நுட்ப வளர்ச்சி வேகமாக முன்னேறிக் கொண்டிருக்கும் நிலையில், இதன் தாக்கம் காரணமாக ஐ.டி. துறையில் பணிபுரியும் 20 லட்சம் பேர் வேலை இழக்கும் அபாயம் இருப்பதாக நிடி ஆயோக் வெளியிட்டுள்ள புதிய ஆய்வறிக்கை எச்சரிக்கிறது. தற்போது 80 லட்சம் பேர் பணியாற்றும் இந்த துறையில், தன்னியக்க நுட்பங்களும் ஏ.ஐ. கருவிகளும் மனித உழைப்பை குறைக்கும் வகையில் செயல்படுவதால், வேலை வாய்ப்பு அமைப்பு மாறும் என்று கூறப்பட்டுள்ளது.
நிடி ஆயோக் தலைமைச் செயல் அதிகாரி பி.வி.ஆர். சுப்ரமண்யம் தெரிவித்ததாவது: “ஏ.ஐ. பாதிப்பால் சில வேலைகள் மறைந்தாலும், புதிதாக ஏ.ஐ. சார்ந்த திறமைகள் கொண்டோருக்கு 40 லட்சம் புதிய வேலை வாய்ப்புகள் உருவாகும். ஆனால், பயிற்சி எடுக்காதவர்களுக்கு வேலையிழப்பு நிச்சயம். எனவே, ஒவ்வொருவரும் தங்களை புதிய தொழில்நுட்பங்களுக்கு ஏற்ப மாற்றிக் கொள்ள வேண்டும்,” என அவர் கூறினார். இதன் மூலம், எதிர்காலத்தில் இந்தியா உலகில் மிக அதிக ஏ.ஐ. நிபுணர்களை கொண்ட நாடாக மாறும் வாய்ப்பு இருப்பதாகவும் அவர் நம்பிக்கை தெரிவித்துள்ளார்.
ஆய்வறிக்கை மேலும் கூறுகிறது: இது வெறும் 20 லட்சம் பேர் வேலை இழப்பு சம்பவம் மட்டுமல்ல; இதனுடன் 2 முதல் 3 கோடி பேரின் வருமானமும் தொடர்புடையது. எனவே, தனிநபர் மற்றும் நிறுவனங்கள் ஏ.ஐ. பயிற்சிகளை மேற்கொண்டு, தங்கள் தொழில் சூழலுக்கு ஏற்ற திறன்களை உருவாக்குவது அவசியம். நிடி ஆயோக், “தேசிய ஏ.ஐ. திறமை இயக்கம்” என்ற பெயரில் நாடு தழுவிய பயிற்சி திட்டத்தை தொடங்க வேண்டுமென பரிந்துரைத்துள்ளது.
இதற்கிடையில், டி.சி.எஸ். உள்ளிட்ட சில பெரிய ஐ.டி. நிறுவனங்கள் பணியாளர் எண்ணிக்கையை குறைக்கும் நடவடிக்கைகளை தொடங்கியுள்ளன. டி.சி.எஸ். நிறுவனம் மட்டும் வரும் 2026 மார்ச் மாதத்துக்குள் 12,000 பணியாளர்களை பணிநீக்கம் செய்யத் திட்டமிட்டுள்ளது. 2023–2024ம் ஆண்டுகளில் 25,000 பேர் வரை வேலை இழந்துள்ளதாக கூறப்படுகிறது. இந்த ஆண்டு அந்த எண்ணிக்கை இரட்டிப்பாகும் என துறையைச் சேர்ந்தவர்கள் கூறுகின்றனர். தொழில்நுட்ப மாற்றத்தால் ஏற்பட்ட இந்த அமைதியான பணிநீக்கங்கள், எதிர்காலத்தில் ஐ.டி. துறையின் பணியமைப்பை முழுமையாக மாற்றக்கூடும் என நிபுணர்கள் எச்சரிக்கின்றனர்.
