சென்னை: தமிழ்நாடு வெற்றிக் கழகத்தின் கொடி அறிமுக விழா இன்று (ஆகஸ்ட் 22) பனையூரில் உள்ள கட்சித் தலைமை அலுவலகத்தில் நடைபெற்றது. இதில் கலந்து கொண்ட கட்சி தலைவர் விஜய் கொடியை அறிமுகம் செய்து வைத்தார். தமிழ்நாடு வெற்றிக் கழகத்தின் கொடி சிவப்பு மற்றும் மஞ்சள் நிறத்தில் இரண்டு போர் யானைகள் மற்றும் நடுவில் ஒரு வாகை பூவைக் கொண்டிருக்கும் வகையில் வடிவமைக்கப்பட்டுள்ளது.
இந்நிகழ்ச்சியில் தவேக நிர்வாகிகள், தொண்டர்கள், விஜய் ரசிகர்கள் திரளாக கலந்து கொண்டனர். விஜயின் பெற்றோர் எஸ்.ஏ.சந்திரசேகர், சோபா சந்திரசேகர் இருவரும் உடனிருந்தனர். நடிகர் விஜய் கடந்த பிப்ரவரி மாதம் தமிழ்நாடு வெற்றி கழகம் என்ற கட்சியை தொடங்கினார். இதற்காக அக்கட்சியின் பொதுச்செயலாளர் என்.ஆனந்த் டெல்லியில் உள்ள இந்திய தேர்தல் ஆணையத்தில் கட்சியை பதிவு செய்தார். அதன்பிறகு வெளியான அறிக்கையில் 2026-ம் ஆண்டு சட்டப்பேரவைத் தேர்தல்தான் இலக்கு என்றும் விஜய் அறிவித்துள்ளார்.
இதையடுத்து 2 கோடி உறுப்பினர்களை கட்சியில் சேர்க்கும் பணி மும்முரமாக நடந்து வருகிறது. அனைத்து மட்டங்களிலும் உள்ள நிர்வாகிகள் உறுப்பினர் சேர்க்கையில் தீவிரமாக ஈடுபட்டுள்ளனர்.
இதற்காக கடந்த 19ம் தேதி பனையூரில் உள்ள கட்சி அலுவலகத்தில் நடுவில் விஜய் படம் பொறித்த கட்சி கொடியை ஏற்றி வைத்து விஜய் ஒத்திகை நடத்தினார். அந்த வீடியோ சமூக வலைதளங்களில் வைரலானது.
