பெங்களூரு: கர்நாடக முதல்வர் பதவியை காங்கிரஸ் தலைமை தனக்கு வழங்கினால் அதை மகிழ்ச்சியுடன் ஏற்றுக்கொள்வேன் என்று கர்நாடக உள்துறை அமைச்சர் சர் பரமேஸ்வரா தெரிவித்துள்ளார்.
கர்நாடக முதல்வர் சித்தராமையா, அவரது மனைவி பார்வதிக்கு நிலம் ஒதுக்கியதில் முறைகேடு நடந்ததாக குற்றச்சாட்டு எழுந்துள்ளது. அவர் மீது வழக்கு பதிவு செய்ய ஆளுநர் தாவர்சந்த் கெலாட் அனுமதி அளித்தார்.
இந்நிலையில், உள்துறை அமைச்சர் பரமேஸ்வரா, பொதுப்பணித்துறை அமைச்சர் சதீஷ் ஜார்கிஹோளியை பெங்களூருவில் உள்ள அவரது இல்லத்தில் நேற்று சந்தித்து பேசினார். சந்திப்புக்கு பின் செய்தியாளர்களிடம் பேசிய பரமேஸ்வரா, “கர்நாடக அரசியல் நிலவரம் குறித்து அமைச்சர் சதீஷ் ஜார்கிஹோளியுடன் விவாதித்தேன்.
முதல்வர் சித்தராமையா மீதான வழக்கு நீதிமன்றத்தில் நிலுவையில் உள்ளது. அதன் முடிவு என்னவாகும் என யாருக்கும் தெரியவில்லை. இருப்பினும் அடுத்த கட்டம் குறித்து ஆலோசித்தோம்.
சித்தராமையா மற்றும் டி.கே.சிவக்குமார் மீதான நடவடிக்கைகளுக்கு எதிராக அனைத்து காங்கிரசார்களும் ஒன்றுபட்டு நிற்கின்றனர். சித்தராமையா முதல்வர் பதவியை ராஜினாமா செய்வது குறித்து காங்கிரஸ் மேலிடம் முடிவெடுக்கும். அதே சமயம், எனக்கு முதல்வர் பதவியை எனக்கு வழங்கினால், அதை மகிழ்ச்சியுடன் ஏற்றுக்கொள்வேன்.
கர்நாடகாவில் பட்டியல் சாதி வேட்பாளர் முதலமைச்சராக வேண்டும் என்பது எங்களின் நீண்ட நாள் கோரிக்கை. சரியான நேரத்தில் சமாளிப்போம்,” என்றார்.
முதல்வர் சித்தராமையாவுக்கு எதிராக பா.ஜ.க. மற்றும் மஜத கட்சியினர் தொடர் போராட்டங்களை நடத்தி வருகின்றனர். இதற்கிடையில், சித்தராமையாவுக்கு எதிராக அமைச்சர்கள் பரமேஸ்வரா, சதீஷ் ஜார்கிஹோளி, ராஜண்ணா ஆகியோர் குரல் கொடுத்ததாக கூறப்படுகிறது.
இதனால் அவருக்கு மேலும் மன உளைச்சல் ஏற்பட்டுள்ளது. குமாரசாமி தலைமையிலான கூட்டணி ஆட்சியில், பட்டியல் சாதியைச் சேர்ந்த பரமேஸ்வரா துணை முதல்வராக இருந்தார். 2013-ல் அவர் காங்கிரஸ் மாநிலத் தலைவராக இருந்தபோது காங்கிரஸ் அமோக வெற்றி பெற்றது.
பரமேஸ்வரா தேர்தலில் தோல்வியடைந்ததால், சித்தராமையாவுக்கு முதல்வர் பதவி வழங்கப்பட்டது குறிப்பிடத்தக்கது.
