வாஷிங்டன்: அமெரிக்காவில் அல்-குவைதா பயங்கரவாதிகள் விமானம் கடத்துவது, கட்டிடங்கள் மீது தாக்குதல் நடத்துவது போன்ற பெரும் தாக்குதலை இஸ்ரேல் மீது நடத்த ஹமாஸ் பயங்கரவாதிகள் திட்டமிட்டிருந்தது தற்போது தெரியவந்துள்ளது.
கடந்த ஆண்டு அக்., 7ல், ஹமாஸ் பயங்கரவாதிகள் பெரும் தாக்குதலில் இஸ்ரேலுக்குள் நுழைந்தனர். அதே சமயம் ஏவுகணைகளை வீசி தாக்கினர். இதில், இஸ்ரேல் தரப்பில், 1,200 பேர் இறந்தனர். மேலும், 250க்கும் மேற்பட்டோர் பிணைக் கைதிகளாக பிடித்து வைக்கப்பட்டனர்.
ஹமாஸ் பயங்கரவாதிகளின் இந்த திடீர் தாக்குதல் இஸ்ரேலையும் உலக நாடுகளையும் அதிர்ச்சிக்குள்ளாக்கியது. ஆனால் இது திடீர் தாக்குதல் அல்ல. இரண்டு ஆண்டுகளுக்கும் மேலாக திட்டமிட்டு நடத்தப்பட்ட ரகசிய தகவல் தற்போது வெளியாகியுள்ளது.
இது குறித்து அமெரிக்க ஊடகங்களில் வெளியான செய்தியில் கூறியிருப்பதாவது: அல்-குவைதா பயங்கரவாதிகள் கடந்த 2001ம் ஆண்டு செப்டம்பர் 11ம் தேதி விமானங்களை கடத்தி அமெரிக்காவின் நியூயார்க் நகர இரட்டை கோபுரங்களில் மோதினர். இதில், ஆயிரக்கணக்கானோர் பலியாகினர்.
இஸ்ரேல் மீது இவ்வளவு பெரிய தாக்குதலை நடத்த ஹமாஸ் திட்டமிட்டது. இது தொடர்பாக, தனக்கு ஆதரவான ஈரான் மற்றும் அண்டை நாடான லெபனானில் இருந்து செயல்படும் ஹிஸ்புல்லா பயங்கரவாத அமைப்புடன் ஆலோசனை நடத்தியது. ஜனவரி 2021 இல் தொடங்கிய கலந்தாய்வு மிகவும் ரகசியமாக வைக்கப்பட்டது.
அவ்வாறு தாக்குதல் நடத்தினால் இஸ்ரேல் பதிலடி கொடுப்பது என்றும், அதை எதிர்கொள்ள தயாராக இருக்க தேவையான அனைத்தையும் செய்யும் என்றும் முடிவு செய்யப்பட்டது. மேலும், ஹமாஸ் இஸ்ரேல் மீது அவ்வப்போது சிறு சிறு தாக்குதல்களை நடத்தி வந்தது.
