கோவை: திமுக ஆட்சியில் கழிவறை கட்டுவதில் கூட ஊழல் நடந்துள்ளது என்று பாஜக மூத்த தலைவர் ஹெச்.ராஜா கூறினார். கோவை பா.ஜ.க., காளப்பட்டி பகுதி புதிய மண்டல தலைவர் உமாதேவி தங்கராஜ் அறிமுக கூட்டம் இன்று அப்பகுதியில் உள்ள தனியார் விடுதியில் நடந்தது. பாஜக தேசிய செயற்குழு உறுப்பினர் எச்.ராஜா சிறப்பு விருந்தினராக கலந்து கொண்டார். அவர் செய்தியாளர்களிடம் கூறியதாவது:-
டாஸ்மாக் நிறுவனத்தில் சோதனை நடத்தப்படும் அதே நேரத்தில், மதுபான ஆலைகளிலும் சோதனை நடத்தப்படுகிறது. குவார்ட்டருக்கு ரூ. 10 மற்றும் புல் பாட்டில் ஒன்றுக்கு ரூ. 40 என வசூலித்ததாக கூறப்படுகிறது. அவர்களது அலுவலகத்திலும் சோதனை நடத்தப்பட்டது. குறைந்தபட்ச ஆதரவு விலையை விட அதிகமாக வசூலிக்கப்பட்டது. தமிழகத்தில் சட்டவிரோதமாக மது வியாபாரம் நடப்பது உறுதி செய்யப்பட்டுள்ளது. ஆயிரம் கோடி என்பது ‘டிப் ஆப் தி ஐஸ்பெர்க்’. எத்தனை கோடி என்பது முழு விசாரணைக்கு பிறகே தெரியவரும்.
இந்த பிரச்னையை கடைசி வரை மக்களிடம் கொண்டு செல்ல பா.ஜ.க., திட்டமிட்டுள்ளது. நாளை சென்னையில் உள்ள டாஸ்மாக் அலுவலகத்தை முற்றுகையிட்டு பா.ஜ.க.வினர் போராட்டம் நடத்த உள்ளனர். 5,000 கடைகள் மற்றும் உயர்மட்டக் கடைகள் முன்பு போராட்டம் தொடரும். திமுக ஆட்சியில் கழிவறை கட்டுவதில் கூட ஊழல் நடந்துள்ளது. புதிய கல்விக் கொள்கை மற்றும் மூன்று மொழிகளுக்கு ஆதரவாக மேற்கொள்ளப்பட்டு வரும் பணிகள் வேகமாக நடைபெற்று வருகின்றன.
விரைவில் ஒரு கோடி கையெழுத்து பெறுவோம். தொகுதி மறு நிர்ணயம் தொடர்பாக முதல்வர் ஸ்டாலின் மற்ற முதல்வர்களை அழைப்பது புலிக்கு பயந்து தன் மீது படுக்க அழைப்பது போன்றது. இவ்வாறு அவர் கூறினார். தேசிய கல்விக் கொள்கை மற்றும் மும்மொழிக் கொள்கைக்கு ஆதரவாக காளப்பட்டி பகுதியில் பாஜக சார்பில் நடத்தப்படும் கையெழுத்து இயக்கத்தில் ஹெச்.ராஜா கலந்து கொண்டார்.
