ஐபிஎல் 2025 கிரிக்கெட் தொடரில் மார்ச் 23ஆம் தேதி சென்னை சூப்பர் கிங்ஸ் (சிஎஸ்கே) தங்களது முதல் போட்டியில் பரம எதிரி மும்பை இந்தியன்ஸ் அணியை சந்திக்கிறது. சேப்பாக்கத்தில் நடைபெறும் அந்தப் போட்டியில், சிஎஸ்கே அணிக்காக எம்எஸ் தோனி அன்கேப்ட் வீரராக களமிறங்குகிறார். சர்வதேச கிரிக்கெட்டில் இந்தியாவுக்காக 3 விதமான வெள்ளைப்பந்து ஐசிசி உலகக் கோப்பைகளை வென்ற ஒரே கேப்டனாக தோனி சாதனை படைத்துள்ளார். ஐபிஎலில் 5 கோப்பைகளை வென்றதோடு, 2 சாம்பியன்ஸ் லீக் கோப்பைகளையும் கைப்பற்றிய தோனி, வரலாற்றின் வெற்றிகரமான கேப்டனாக கருதப்படுகிறார்.
சர்வதேச கிரிக்கெட்டில் 2019 உலகக் கோப்பையுடன் ஓய்வு பெற்ற தோனி, ஐபிஎல் தொடரில் மட்டும் தொடர்ந்து விளையாடி வருகிறார். 2020ஆம் ஆண்டிலிருந்து, தோனி எப்போது ஓய்வு பெறுவார் என்பது பலரது கேள்வியாக உள்ளது. ஆனால் எதிர்பார்ப்புகளை மிஞ்சிய விதமாக, தனது ஃபிட்னஸை கையாண்டு, சிறப்பாக ஆடி வருகிறார். கடந்த ஆண்டு, வருங்கால அணிக்காக சிஎஸ்கே கேப்டன்ஷிப் பொறுப்பை ருதுராஜ் கையில் ஒப்படைத்த தோனி, சாதாரண கீப்பராக மட்டும் விளையாடுகிறார்.
2022 முதல் முழங்கால் வலியால் பாதிக்கப்பட்ட நிலையில், பேட்டிங்கில் கடைசி ஓவர்களில் மட்டுமே களமிறங்கும் அவர், அதிலும் பௌண்டரிகளையும் சிக்சர்களையும் அடித்து ரசிகர்களை கவர்ந்து வருகிறார். வயதானாலும் தமது ஸ்டைலை மாறாமல் போட்டியில் நீடிக்கிறார். மேலும், தம்முடைய சிஎஸ்கே அணிக்காக விரும்பும் வரை விளையாடுவேன் என தோனி அறிவித்துள்ளார்.
ஆனால் 43 வயதில் வீட்டில் அமராமல் விளையாடும் தோனியை சில எதிரணி ரசிகர்கள் கிண்டலடித்து வருகிறார்கள். “இதெல்லாம் தேவையா?” என கேள்வி எழுப்பும் அவர்களுக்கு பதிலளிக்கும் வகையில், முன்னாள் வீரர் சுனில் கவாஸ்கர் தோனிக்கு ஆதரவு தெரிவித்தார்.
இதுகுறித்து கவாஸ்கர் கூறுகையில், “தோனி எப்போது ஓய்வு பெறுவார் என்று நாம் ஏன் கேட்க வேண்டும்? அவர் இன்னும் இளம் வீரர்களுக்கே நிகராக விளையாடிக்கொண்டிருக்கிறார். அவர்மீது அழுத்தம் செலுத்த தேவையில்லை. ஒவ்வொரு முறையும் மக்கள் தோனியை பற்றி கேள்வி எழுப்பும் போது, அவர் அவர்களை தவறு என்று நிரூபித்து வருகிறார்” என்றார்.
மேலும், “இந்த வயதிலும் அவர் வெறும் பவுண்டரியை மட்டும் அடிக்கவில்லை. பெரிய சிக்ஸர்களை பறக்க விடுகிறார். அவரின் திறமையை சந்தேகப்பட வேண்டிய அவசியம் இல்லை. தோனிக்கு வயது என்பது வெறும் எண்ணிக்கை மட்டுமே. அவரது ஆர்வம், வெற்றிக்கான பசி குறையவில்லை” என்று அவர் கூறினார்.
இவ்வாறு, வயதை வெல்லும் தோனியின் ஆட்டம் ரசிகர்களையும், முன்னாள் வீரர்களையும் தொடர்ந்து ஆச்சர்யப்படுத்தி வருகிறது. இம்முறை ஐபிஎல் தொடரில் தோனி இன்னும் எத்தனை மைல்கற்களை எட்டுவார் என்பதுதான் ரசிகர்களின் எதிர்பார்ப்பு.
