புதுடில்லி: ஐந்து ஆண்டுகளுக்குப் பின் கைலாஷ்-மானசரோவர் யாத்திரை மீண்டும் தொடங்கப்படுகிறது. இந்த புனிதப் பயணத்திற்கு 750 பக்தர்கள் தேர்வாகியுள்ளனர். இமயமலைத்தொடரில், திபெத் பகுதியில் அமைந்துள்ள கைலாஷ் மலை ஹிந்துக்களுக்கு மிகவும் முக்கியமான புனித தலம். இந்தியா-சீனா ஒப்பந்தத்தின் அடிப்படையில் 1981ல் இந்த யாத்திரை தொடங்கப்பட்டது.
ஆனால் 2020ல் கொரோனா மற்றும் எல்லை பதற்றம் காரணமாக நிறுத்தப்பட்டது.2024ல் பிரதமர் மோடி மற்றும் சீன அதிபர் ஷீ ஜின்பிங் இடையே பேச்சுவார்த்தைக்கு பிறகு, 2025ஆம் ஆண்டு யாத்திரை மீண்டும் துவங்கும் என அறிவிக்கப்பட்டது. ஜூன் முதல் ஆகஸ்ட் வரை நடைபெறும் யாத்திரைக்காக 5,561 பேர் ஆன்லைனில் பதிவு செய்தனர். வெளியுறவு அமைச்சகம் கணினி வழியில் குலுக்கல் முறையில் தேர்வு செய்ததில் 750 பேர் யாத்திரைக்கு தகுதி பெற்றனர்.
இவர்கள் உத்தரகண்டில் உள்ள லிபுலேக் கணவாய் மற்றும் சிக்கிமின் நாது லா கணவாய் வழியாக குழுக்களாகப் பயணிக்கின்றனர். இந்த யாத்திரை அரசு அனுமதியுடனும் பாதுகாப்புடனும் நடைபெறவுள்ளது. கடந்த வருடங்களின் இடைவெளிக்குப் பின், பக்தர்களிடையே இந்த தகவல் பெரும் மகிழ்ச்சியை ஏற்படுத்தியுள்ளது. யாத்திரை பாதையின் பொது வசதிகள், சுகாதாரம் மற்றும் பாதுகாப்பு நடவடிக்கைகள் குறித்து அரசு முன்னெச்சரிக்கையாக செயல்படுகிறது.
இந்தியா மற்றும் சீனாவின் ஒத்துழைப்பின் அடிப்படையில் இந்த யாத்திரை தொடர்ந்து நடைபெறுமென எதிர்பார்க்கப்படுகிறது.இதற்காக தெரிவான யாத்ரீகர்களுக்கு பயண அனுமதி, மருத்துவ பரிசோதனை, பயிற்சி ஆகியவை வழங்கப்படும். இதை வெளிவிவகார அமைச்சகம் ஒருங்கிணைத்து நடத்துகிறது. கடந்த ஆண்டுகளில் யாத்திரை தவிர்க்கப்பட்டதால் இந்த ஆண்டு ஆர்வம் அதிகரித்துள்ளது. யாத்திரை வெற்றிகரமாக நடைபெறும் என அதிகாரிகள் நம்பிக்கை தெரிவித்துள்ளனர்.
