திருவண்ணாமலை: பஞ்ச பூத தலங்களில் அக்னி ஸ்தலமாக திருவண்ணாமலை அண்ணாமலையார் கோவில் உள்ளது. ஆயிரம் ஆண்டுகள் பழமையும் பெருமையும் கொண்ட இக்கோயில் ஆன்மிக வரலாறு நிறைந்தது.
மலையே மகேசன் திருவடிவம் வேறு எதிலும் இல்லாத தனிச்சிறப்பு. எண்ணற்ற மகான்களையும், ஞானிகளையும் கவர்ந்த அண்ணாமலைக்கு லட்சக்கணக்கான பக்தர்கள் குவிகின்றனர்.
தமிழ் அமாவாசை நாட்களில் மலை வலம் வரும் நிலை மாறி, பௌர்ணமி நாட்களில் லட்சக்கணக்கான பக்தர்கள் கிரிவலம் செல்கின்றனர். சமீப காலமாக பௌர்ணமி தினங்களில் மட்டுமின்றி வாரத்தின் அனைத்து நாட்களிலும் பக்தர்கள் கிரிவலம் சென்று வருகின்றனர்.
குறிப்பாக வார இறுதி நாட்களிலும், அரசு விடுமுறை நாட்களிலும் திருவண்ணாமலை நகரம் பண்டிகைக் காட்சியாக மாறும். தினமும் ஆயிரக்கணக்கான பக்தர்கள் கிரிவலம் வருகின்றனர்.
இதுதவிர, கிரிவலம் கால் நடையாக செல்வது மட்டுமின்றி, அடி பிரதட்சண கிரிவலம், அங்க பிரதட்சண கிரிவலம், பரத நாட்டியம் ஆடிய கிரிவலம், நெய் விளக்கு ஏந்தியபடி கிரிவலம் என இன்னும் வினோதமான கிரிவலம் வந்துள்ளது.
குறிப்பாக, ஆந்திரா, தெலுங்கானா, கர்நாடகா மாநிலங்களில் இருந்து வரும் கிரிவல பக்தர்களின் எண்ணிக்கை கணிசமாக அதிகரித்துள்ளது. எனவே, கிரிவல பாதை மட்டுமின்றி கோயில்கள், வணிக நிறுவனங்களில் தமிழ், ஆங்கிலத்துடன் தெலுங்கிலும் தகவல் எழுதப்படும் நிலை உள்ளது.
எனவே, திருவண்ணாமலைக்கு வரும் பக்தர்களுக்கு தேவையான பாதுகாப்பு உள்ளிட்ட அடிப்படை வசதிகளை மேம்படுத்த வேண்டும். இந்நிலையில், கிரிவல பாதை வழித்தடத்தில் பல்வேறு இடங்களில் அமைந்துள்ள காவல்துறை உதவி மையங்கள் பௌர்ணமி மற்றும் திருவிழாக் காலங்களில் மட்டும் செயல்படும்.
மற்ற நாட்களில் பூட்டப்படும். தற்போது தினமும் இரவு பக்தர்கள் கிரிவலம் வருகின்றனர். எனவே, அவர்களின் அச்சத்தைப் போக்கவும், அவர்களின் பாதுகாப்பை உறுதி செய்யவும் காவல் உதவி மையங்கள் தினமும் செயல்படுவது அவசியம்.
கிரிவல பாதையின் பாதுகாப்பை மேம்படுத்த பொதுப்பணித்துறை அமைச்சர் எ.வ.வேலு முயற்சியால் கிரிவல பாதையில் கடந்த ஆண்டு புதிய மேற்கு காவல் நிலையம் தொடங்கப்பட்டது.
அதேபோல், கிரிவல பாதையில் தாலுகா காவல் நிலையம் ஏற்கனவே செயல்பட்டு வருகிறது. இருப்பினும், காவல் உதவி மையங்கள் செயல்பட்டால், தனியாகவோ, குழந்தைகளுடன் வரும் பக்தர்கள் அச்சமின்றி கிரிவலம் செல்ல உதவியாக இருக்கும்.
மேலும், கிரிவலப் பாதையில் பொருத்தப்பட்டுள்ள சிசிடிவி கண்காணிப்பு கேமராக்கள் பல இடங்களில் இயங்கவில்லை. கம்பிகள் துண்டிக்கப்பட்டுள்ளன. கட்டுப்பாட்டு அறையிலிருந்து சிசிடிவி கேமராக்கள் துண்டிக்கப்பட்டுள்ளன.
எனவே, குற்ற சம்பவங்களை கண்காணிக்கும் மூன்றாவது கண்ணாக செயல்படும் சிசிடிவி கேமராக்களை 24 மணி நேரமும் செயல்பட வைக்க நடவடிக்கை எடுக்க வேண்டும் என பக்தர்கள் எதிர்பார்க்கின்றனர்.
அதேபோல், குற்றச் தடுப்பு கண்காணிப்பு பணிக்காக அமைக்கப்பட்டுள்ள ரோந்து வாகனங்களும் பெரும்பாலான நாட்களில் இயங்குவதில்லை. கிரிவல பாதையில் உள்ள உயர் கோபுர மின் விளக்குகள் பல இடங்களில் எரிவதில்லை.
அவை பௌர்ணமி நாட்களில் மட்டுமே ஒளிரும். இதனால், இருள் சூழ்ந்த பகுதி வழியாக செல்லும் பக்தர்கள் அச்சப்படுகின்றனர். மேலும், பக்தர்களின் பயன்பாட்டிற்காக அமைக்கப்பட்டுள்ள கழிப்பறைகளை முறையாக பராமரித்து அனைத்து நாட்களிலும் திறந்து வைக்க வேண்டும் என்பது பக்தர்களின் கோரிக்கையாக உள்ளது.
அதேபோல், கிரிவல பாதையில் வாகனங்கள் அசுர வேகத்தில் செல்வதால், பக்தர்களுக்கு உயிர் பயம் ஏற்படுகிறது.
எனவே, கனரக வாகனங்களை கட்டுப்படுத்தவும், வாகனங்களின் வேகத்தை கட்டுப்படுத்தவும், விதிகளை மீறும் வாகனங்கள் மீது நடவடிக்கை எடுக்க வேண்டும் என்பது பக்தர்களின் கோரிக்கையாக உள்ளது.
