தமிழகத்தின் மூன்றாவது துணை முதல்வராக உதயநிதி ஸ்டாலின் பொறுப்பேற்றுள்ள நிலையில், அவருக்கு பல்வேறு தரப்பில் இருந்து வாழ்த்துகள் குவிந்து வருகின்றன. முதல்வர் மு.க.ஸ்டாலினின் பரிந்துரையை ஏற்று உதயநிதி ஸ்டாலினை துணை முதல்வராக நியமித்து ஆளுநர் ஆர்.என்.ரவி உத்தரவிட்டுள்ளார்.
இளைஞர் நலன் மற்றும் விளையாட்டு மேம்பாட்டுத் துறை அமைச்சராக இருந்த உதயநிதி ஸ்டாலின், துணை முதல்வராக நியமிக்கப்பட்டு, அவருக்குத் திட்டம் மற்றும் மேம்பாட்டுத் துறை கூடுதல் பொறுப்பாக வழங்கப்பட்டு ஆளுநர் மாளிகை சனிக்கிழமை வெளியிட்ட அறிவிப்பில் தெரிவிக்கப்பட்டுள்ளது.
இந்நிலையில் துணை முதல்வர் உதயநிதி ஸ்டாலினுக்கு நடிகர்கள் சிலம்பரசன், வடிவேலு மற்றும் திரையுலகினர் பலரும் வாழ்த்து தெரிவித்துள்ளனர். நடிகர் சிலம்பரசன் தனது X சமூக வலைதளப் பதிவில், “வாழ்த்துக்கள் உதயநிதி ஸ்டாலின் அண்ணா! பல சாதனைகள் காத்திருக்கின்றன” என்று எழுதியுள்ளார்.
நடிகர் வடிவேலு தனது வாழ்த்துச் செய்தியில், “துணை முதல்வராகப் பதவியேற்றுள்ள அன்பு சகோதரர் உதயநிதி ஸ்டாலினுக்கு வேகமும் விவேகமும் தொடர் வெற்றியைத் தர வாழ்த்துகள்” என்று கூறியுள்ளார். முன்னதாக நடிகர்கள் கமல்ஹாசன், தனுஷ் ஆகியோரும் துணை முதல்வர் உதயநிதி ஸ்டாலினுக்கு வாழ்த்து தெரிவித்தனர்.
