சென்னை: சென்னை நுங்கம்பாக்கத்தில் உள்ள ஒரு தனியார் பாரில் தகராறில் ஈடுபட்டதாக மயிலாப்பூரைச் சேர்ந்த அதிமுக ஐடி பிரிவு நிர்வாகி பிரசாத், மற்றொரு அதிமுக பிரமுகர் அஜய் வாண்டையார் மற்றும் பிரபல ரவுடி சுனாமி சேதுபதி ஆகியோர் கைது செய்யப்பட்டனர். அதன் பிறகு, அதிமுக ஐடி பிரிவு நிர்வாகி பிரசாத் அரசு வேலை வாங்கித் தருவதாக கூறி மக்களை ஏமாற்றியதாக காவல்துறையில் புகார்கள் அளிக்கப்பட்டன.
இது தொடர்பாக நுங்கம்பாக்கம் மற்றும் மைலாப்பூர் காவல் நிலையங்களில் மூன்று வழக்குகள் பதிவு செய்யப்பட்டன. மேலும், பிரசாத் போதைப்பொருள் பயன்படுத்தியதாக புகார்கள் வந்தன. இது தொடர்பாக அவரிடம் விசாரணை நடைபெற்று வருகிறது. அந்த வகையில், அவர் யாரிடமிருந்து போதைப்பொருள் வாங்கினார், யாருக்கு சப்ளை செய்தார் என்பதைக் கண்டறிய தீவிர விசாரணை நடத்தப்பட்டது. இந்நிலையில், கோகைன் சப்ளை வழக்கில் கைது செய்யப்பட்ட முன்னாள் அதிமுக நிர்வாகி பிரசாத் மற்றும் பிரதீப் குமார் ஆகியோரிடம் நடத்தப்பட்ட விசாரணையின் போது, ஸ்ரீகாந்துக்கு ஒரு கிராம் கோகைனை ரூ.12,000-க்கு விற்றதாக பிரசாத் தெரிவித்தார்.
பிரசாந்த் என்ற நபர் ஸ்ரீகாந்துக்காக தன்னிடம் இருந்து போதைப்பொருள் வாங்கியதாக பிரதீப் ஒப்புக்கொண்டார். ரோஜாக்கூட்டம், ஏப்ரல், மனசெல்லாம், பார்த்திபன் கனவு உள்ளிட்ட பல படங்களில் ஸ்ரீகாந்த் நடித்துள்ளார். இதைத் தொடர்ந்து, சென்னை நுங்கம்பாக்கம் போலீசார் நடிகர் ஸ்ரீகாந்தை 2 மணி நேரம் விசாரித்த பிறகு, கீழ்ப்பாக்கம் அரசு மருத்துவமனையில் மருத்துவ பரிசோதனை நடத்தப்பட்டதாக தெரிவிக்கப்பட்டது.
இதையடுத்து, ரத்த மாதிரிகள் பரிசோதிக்கப்பட்டதாகவும், அவர் போதைப்பொருள் பயன்படுத்தியது கண்டறியப்பட்டதாகவும் தெரிவிக்கப்பட்டது. இயக்குனர் விஷ்ணுவர்தன் தம்பி மற்றும் நடிகர் கிருஷ்ணா ஆகியோர் இதில் ஈடுபட்டதாக தகவல் வெளியாகியுள்ளது.
