மும்பை நகரில் பிக் பாஸ் நிகழ்ச்சியில் பங்கேற்று பிரபலமடைந்த பல நடிகர்கள், தங்களின் தனித்துவமான குணங்களாலும் நிகழ்ச்சியின் பரபரப்பாலும் ரசிகர்களிடம் வித்தியாசமான இடத்தைப் பெற்றுள்ளனர். ஒவ்வொரு ஆண்டும் புதிய போட்டியாளர்களை தேர்வு செய்வதில் நிகழ்ச்சி குழு ஆர்வம் காட்டி வருகிறது. இந்நிலையில், கடந்த 11 ஆண்டுகளாக பிக் பாஸ் தரப்பில் அழைப்பு விடுக்கப்பட்டும் பங்கேற்க மறுத்து வரும் நடிகை தனுஸ்ரீயின் முடிவு தற்போது பெரும் விவாதமாகியுள்ளது.
தனுஸ்ரீக்கு பிக் பாஸ் குழுவினர் ஒரு கோடியே 15 லட்சம் வரை சம்பளம் வழங்க தயாராக இருந்தாலும், அவர் அதனை மறுத்துவிட்டார். அதற்குக் காரணமாக, நிகழ்ச்சியில் பங்கேற்றால் மற்றொரு பெண்ணுடன் படுக்கையைப் பகிர்ந்து கொள்ள வேண்டியிருக்கும் சூழல் என அவர் தெரிவித்துள்ளார். “எனக்கு என் படுக்கையை யாருடனும் பகிர்ந்து கொள்ள இயலாது. கோடிக்கோடி பணம் கொடுத்தாலும் இதற்கு சம்மதிக்க முடியாது” என அவர் உறுதியாக கூறியுள்ளார். மேலும், ஒரே அறையில் ஆண்களும் பெண்களும் ஒன்றாக தங்கும் விதிமுறையும் அவருக்குப் பிடிக்கவில்லை என்பதால் பிக் பாஸ் நிகழ்ச்சியில் கலந்து கொள்ள விருப்பம் இல்லை என தெரிவித்துள்ளார்.
இதனுடன், மலையாள பிக் பாஸ் நிகழ்ச்சியிலும் சர்ச்சை உருவாகியுள்ளது. தன்பாலினத்தவரான போட்டியாளர் ஒருவரை வீட்டிற்குள் விட விரும்பாத மற்றொரு போட்டியாளருக்கு, தொகுப்பாளர் மோகன்லால் கடுமையாக கண்டனம் தெரிவித்தார். “எனது வீட்டில் நான் அவரை விடுவேன். உங்களுக்கு பிடிக்கவில்லை என்றால் நிகழ்ச்சியை விட்டு வெளியேறலாம்” என்று அவர் நேரடியாக கூறியதால், இந்த விவகாரம் பேசுபொருளாகியுள்ளது.
தமிழகத்தில் பிக் பாஸ் சீசன் 9 வருகிற அக்டோபர் 5ஆம் தேதி தொடங்கவுள்ளது. இதில் யார் யார் பங்கேற்கப்போகிறார்கள் என ரசிகர்கள் ஆவலுடன் காத்திருக்கின்றனர். ஒவ்வொரு ஆண்டும் பரபரப்பை ஏற்படுத்தும் இந்த நிகழ்ச்சி, இந்த முறை எவ்வித அதிர்ச்சிகளை கொடுக்கப்போகிறது என்பதை அறிய ரசிகர்கள் உற்சாகத்துடன் காத்திருக்கின்றனர்.
