தமிழ் உட்பட தென்னிந்திய மொழிகளிலும் நடித்துள்ள இந்தி இயக்குனரும் நடிகருமான அனுராக் காஷ்யப், ‘மகாராஜா’ படத்தில் தனது நடிப்பிற்காகப் பேசப்பட்டார். ‘தி இந்து’ ஏற்பாடு செய்த சமீபத்திய கலந்துரையாடல் நிகழ்ச்சியில் பேசிய அவர், பான் இந்தியா படங்கள் ஒரு பெரிய மோசடி என்று விமர்சித்தார். “‘பான்-இந்தியா’ என்ற சொல் ஒரே நேரத்தில் வெவ்வேறு இந்திய மொழிகளில் வெளியாகும் படங்களைக் குறிக்கிறது. ‘பாகுபலி’ வெற்றிக்குப் பிறகு இந்தப் போக்கு அதிகரித்தது.
பின்னர், ‘கேஜிஎஃப்’ மற்றும் ‘புஷ்பா’ போன்ற படங்களின் பிளாக்பஸ்டர் வெற்றி, இந்தியா முழுவதும் விநியோகத்தை மேலும் அதிகரித்தது. இது மேலும் அதிகரிக்கும். ஒன்று, ஒரு பான்-இந்தியா படம் 3 முதல் 4 ஆண்டுகள் வரை தயாரிக்கப்படுகிறது. பலர் தங்கள் வாழ்வாதாரத்திற்காக அந்தப் படத்தைச் சார்ந்துள்ளனர். அவர்களின் வாழ்வாதாரமும் மூன்று முதல் நான்கு ஆண்டுகள் வரை படத்தைச் சார்ந்துள்ளது.
ஆனால், தயாரிப்பாளரின் முழுப் பணமும் படத்தை நோக்கிச் செல்வதில்லை. அது அர்த்தமற்ற, பிரமாண்டமான, யதார்த்தமற்ற ‘செட்’களுக்குச் செலவிடப்படுகிறது. இந்தியில் ‘உரி: த சர்ஜிக்கல் ஸ்ட்ரைக்’ வெற்றிக்குப் பிறகு, அவர்கள் அப்படிப்பட்ட படங்களைத் தயாரிக்கத் தொடங்கினர். ‘பாகுபலி’ வெற்றிக்குப் பிறகு, அவர்கள் பிரபாஸை வைத்து பெரிய பட்ஜெட் படங்களைத் தயாரிக்கத் தொடங்கினர். ‘கேஜிஎஃப்’ வெற்றிக்குப் பிறகு, அவர்கள் அதைப் பின்பற்ற விரும்பினர். கதைசொல்லலின் சரிவு அங்குதான் தொடங்குகிறது,” என்று அவர் கூறினார்.
