தயாரிப்பாளரும் நடிகருமான ஜேஎஸ்கே இயக்கத்தில் உருவாகியுள்ள படம் ‘ஃபயர்’. இதில் பாலாஜி முருகதாஸ், ரசிதா மகாலட்சுமி, சாக்ஷி அகர்வால், காயத்ரி ஷான், சாந்தினி தமிழரசன், சிங்கம்புலி, சுரேஷ் சக்ரவர்த்தி மற்றும் பலர் நடித்துள்ளனர். ஜேஎஸ்கே ஃபிலிம் கார்ப்பரேஷன் தயாரிக்கும் இப்படத்திற்கு டிகே இசையமைத்துள்ளார்.
சதீஷ் ஜி பாபு ஒளிப்பதிவு செய்துள்ளார். ஜீவா வசனம் எழுதியுள்ளார். ஆடியோ வெளியீட்டு விழா சென்னையில் நடந்தது. தமிழ்நாடு திரைப்பட இயக்குநர்கள் சங்கத் தலைவர் ஆர்.வி. உதயகுமார், தயாரிப்பாளர் சங்கத் தலைவர் என்.முரளி ராமசாமி, டி.சிவா, பாண்டியராஜன் மற்றும் படக்குழுவினர் கலந்து கொண்டனர்.
இப்படம் பற்றி ஜே.எஸ்.கே கூறும்போது, “இந்தப் படம் தமிழகத்தையே உலுக்கிய உண்மைக் கதையை அடிப்படையாகக் கொண்டது. இப்படம் நான்கு பெண்களைப் பற்றிய கதை. இது ஒரு விழிப்புணர்வு படமாகவும் கொள்ளலாம். எஸ்.கே.ஜீவா அருமையான வசனங்களை எழுதியுள்ளார்.
போலீஸ் அதிகாரியாக நடித்துள்ளேன். படம் தயாரானதும் பெண்களுக்கும், ஆட்டோ ஓட்டுனர்களுக்கும் தனித்தனியாக திரையிட்டு கருத்து கேட்டேன். அனைவரும் நல்ல விமர்சனங்களை கொடுத்துள்ளனர். படத்தின் ரிலீஸ் தேதி விரைவில் அறிவிக்கப்படும்,” என்றார்.
