‘டிராகன்’ படம் உலகம் முழுவதும் ரூ.100 கோடி வசூலை கடந்துள்ளதாக படக்குழு அறிவித்துள்ளது. பிப்ரவரி 21-ம் தேதி வெளியாகி மாபெரும் வரவேற்பைப் பெற்ற ‘டிராகன்’ படம் வெளியான 10 நாட்களில் ரூ.100 கோடி வசூலைக் கடந்துள்ளதாக படக்குழு அறிவித்துள்ளது. இப்படம் உலகம் முழுவதும் நல்ல வரவேற்பை பெற்றுள்ளது. குறிப்பாக அமெரிக்காவில் ரூ.1 மில்லியன் வசூலை கடந்துள்ளது குறிப்பிடத்தக்கது. 2025-ல் வெளியான முதல் தமிழ்த் திரைப்படம் என்ற பெருமையையும் அமெரிக்காவில் ரூ.1 மில்லியனைத் தாண்டியுள்ளது.
இப்படத்திற்கு பிறகு சில படங்கள் தமிழகத்தில் வெளியானாலும் எதிர்பார்த்த வரவேற்பை பெறவில்லை. இதனால் தியேட்டர் உரிமையாளர்கள் தொடர்ந்து ‘டிராகன்’ படத்துக்கு முன்னுரிமை கொடுத்து வருகின்றனர். மேலும், தெலுங்கிலும் படத்திற்கு நல்ல வரவேற்பு கிடைத்துள்ளது. அஸ்வத் மாரிமுத்து இயக்கத்தில் பிரதீப் ரங்கநாதன், அனுபமா பரமேஸ்வரன், கயாடு லோஹர், மிஷ்கின், கௌதம் மேனன் மற்றும் பலர் நடித்துள்ள படம் ‘டிராகன்’. இப்படத்தை ஏஜிஎஸ் நிறுவனம் தயாரித்து அதே நிறுவனம்தான் உலகம் முழுவதும் வெளியிட்டது என்பது குறிப்பிடத்தக்கது.
