‘காளிதாஸ்’ பரத் நடிப்பில் 2019-ம் ஆண்டு வெளியாகி விமர்சன ரீதியாகவும், வணிக ரீதியாகவும் பாராட்டப்பட்ட படம். ‘காளிதாஸ் 2’ படத்தை அதன் இயக்குனர் ஸ்ரீ செந்தில் இயக்குகிறார். இதன் ஃபர்ஸ்ட் லுக் போஸ்டரை விஜய் சேதுபதி தனது எக்ஸ் தளத்தில் வெளியிட்டுள்ளார். இப்படத்தின் படப்பிடிப்பு முடிவடைந்து இறுதிக்கட்ட பணிகள் நடைபெற்று வருகின்றன. ஸ்ரீ செந்தில் இயக்கியுள்ள இப்படத்தில் பரத், அஜய் கார்த்திக், பிரகாஷ் ராஜ், ‘ஆடுகளம்’ கிஷோர், சுரேஷ் மேனன், ஆனந்த் நாக், பவானி ஸ்ரீ, அபர்ணதி மற்றும் பலர் நடித்துள்ளனர்.
இவர்களுடன் ‘பூவே உனக்கா’ படத்தின் மூலம் பிரபலமான சங்கீதாவும் முக்கிய வேடத்தில் நடித்துள்ளார். இந்தப் படத்தின் மூலம் மீண்டும் நடிக்க வந்துள்ளார். ‘காளிதாஸ் 2’ படத்திற்கு சுரேஷ் பாலா ஒளிப்பதிவாளராக பணியாற்ற, சாம் சிஎஸ் இசையமைத்துள்ளார். க்ரைம் த்ரில்லர் படமாக உருவாகி வரும் இப்படத்தை ஃபைவ் ஸ்டார் செந்தில் தயாரித்துள்ளார்.
படம் பற்றி இயக்குனர் ஸ்ரீ செந்தில் கூறும்போது, “காளிதாஸ் படத்தின் முதல் பாகம் ரசிகர்களிடம் நல்ல வரவேற்பை பெற்றதை தொடர்ந்து அதன் இரண்டாம் பாகம் தற்போது க்ரைம் த்ரில்லராக உருவாகி வருகிறது. இப்படத்தின் படப்பிடிப்பு சென்னை மற்றும் கேரளாவில் நடைபெற்றது. இப்படம் ரசிகர்களுக்கு வித்தியாசமான சினிமா அனுபவத்தை அளிக்கும்” என்றார். கோடை விடுமுறையில் படம் திரையரங்குகளில் வெளியாகும்.
