நித்திலன் சாமிநாதன் இயக்கத்தில் விஜய் சேதுபதி நடித்த ‘மகாராஜா’ படம் மிகப்பெரிய வரவேற்பை பெற்றது. திரையரங்குகளில் மட்டுமின்றி, பல்வேறு நாடுகளிலும் ஓடிடி தளத்தில் தொடர்ந்து முதலிடத்தில் இருந்தது. இதற்கு கிடைத்த வரவேற்பால் இப்படம் சீனாவில் வெளியானது.
‘மகாராஜா’ படமும் சீன மக்கள் மத்தியில் பெரும் வரவேற்பை பெற்றுள்ளது. விரைவில் ரூ.100 கோடியை தாண்டும் என எதிர்பார்க்கப்படுகிறது. அதுமட்டுமின்றி ‘பாகுபலி 2’ படத்தின் வசூலையும் முறியடித்துள்ளது. தற்போது அதிக வசூல் செய்த தென்னிந்திய திரைப்படம் என்ற மாபெரும் சாதனையை படைத்துள்ளது. அதிக வசூல் செய்த இந்திய படங்களில் ‘மகாராஜா’ 10-வது இடத்தில் உள்ளது.
‘மகாராஜா’ மொத்தமாக உலகம் முழுவதும் ரூ. 193 கோடி வசூலை எட்டியுள்ளது. இதை ஃபேஷன் ஸ்டுடியோஸ் மற்றும் தி ரூட் இணைந்து தயாரித்து வெளியிட்டது. இதில் விஜய் சேதுபதியுடன் மம்தா மோகன்தாஸ், அனுராக் காஷ்யப், நட்டி, சிங்கம்புலி மற்றும் பலர் நடித்துள்ளனர். விஜய் சேதுபதி நடிப்பில் வெளியான 50-வது படம் ‘மகாராஜா’ என்பது குறிப்பிடத்தக்கது.
