‘ஆர்ஆர்ஆர்’ படத்தின் வெற்றிக்குப் பிறகு, ராஜமௌலி மகேஷ் பாபு நடிக்கும் படத்தை இயக்குகிறார். பிருத்விராஜ் மற்றும் பிரியங்கா சோப்ரா முக்கிய வேடங்களில் நடிக்கின்றனர். இந்தப் படம் ‘இண்டியானா ஜோன்ஸ்’ போலவே உலகளாவிய அதிரடி சாகசப் படமாக இருக்கும் என்று ராஜமௌலி ஏற்கனவே கூறியிருந்தார். இதன் முக்கியமான காட்சிகள் காசியில் நடைபெற உள்ளன.
ராஜமௌலியின் தந்தை விஜயேந்திர பிரசாத், மகேஷ் பாபுவின் கதாபாத்திரம் அவருக்கு அனுமனை நினைவூட்டும் வகையில் வடிவமைக்கப்பட்டுள்ளதாகவும், படப்பிடிப்பு கென்யாவின் காடுகளில் நடைபெறும் என்றும் கூறியிருந்தார். அதன்படி, கென்யாவில் இந்தப் படத்தின் படப்பிடிப்பு சமீபத்தில் நிறைவடைந்தது. இதற்காக அங்கு சென்ற ராஜமௌலி மற்றும் அவரது குழுவினர், அந்நாட்டு வெளியுறவு அமைச்சர் முசாலியா முடவாடி மற்றும் அதிகாரிகளைச் சந்தித்தனர்.
அந்த புகைப்படங்களை கென்ய அமைச்சர் சமூக ஊடகங்களில் பகிர்ந்துள்ளார். இதற்கிடையில், கென்யாவில் படம் படமாக்கப்பட்டபோது ஒரு ரசிகர் எடுத்த புகைப்படம் ஆன்லைனில் கசிந்துள்ளது. மகேஷ் பாபு ஒரு சிங்கத்தின் முன் நிற்பதைக் காட்டுகிறது.
கடுமையான பாதுகாப்பு இருந்தபோதிலும், காட்சி கசிந்தது படக்குழுவினரை அதிர்ச்சிக்குள்ளாக்கியுள்ளது. இந்தப் படத்தின் படப்பிடிப்பு ஒடிசாவில் நடைபெற்றுக் கொண்டிருந்தபோது, அந்தக் காட்சிகளும் கசிந்தன.
