சென்னை: ரஜினியின் ‘வேட்டையன்’ படத்தின் ரிலீஸ் தேதி குறித்த வதந்திகளுக்கு படக்குழு முற்றுப்புள்ளி வைத்துள்ளது.
தா.செ.ஞானவேல் இயக்கத்தில் ரஜினி, அமிதாப் பச்சன், ராணா, ஃபகத் பாசில், துஷாரா விஜயன், ரித்திகா சிங் மற்றும் பலர் நடித்துள்ள படம் ‘வேட்டையன்’. லைகா நிறுவனம் தயாரிக்கும் இந்த படத்திற்கு அனிருத் இசையமைக்கிறார்.
இதன் படப்பிடிப்பு முடிவடைந்து இறுதிக்கட்ட பணிகள் விறுவிறுப்பாக நடைபெற்று வருகிறது. இப்படம் அக்டோபர் 10-ம் தேதி வெளியாகும் என படக்குழு அதிகாரப்பூர்வமாக அறிவித்துள்ளது.
இந்நிலையில் நேற்று (செப்டம்பர் 6) முதல் ‘வேட்டையன்’ படத்தின் வேலைகள் முடிவடையாததால் படத்தின் வெளியீட்டில் மாற்றம் இருப்பதாக தகவல் பரவியது. இதனால் அதே தேதியில் ‘கங்குவா’ வெளியாகும் சூழல் உருவானது.
இந்த வதந்திகளை பொய்யாக்கும் வகையில் ‘வேட்டையன்‘ படக்குழு புதிய போஸ்டரை வெளியிட்டுள்ளது. விநாயகர் சதுர்த்தியை முன்னிட்டு வெளியிடப்பட்டுள்ள இந்த போஸ்டரில் படம் அக்டோபர் 10-ம் தேதி வெளியாகும் என படக்குழு தெரிவித்துள்ள வதந்திக்கு முற்றுப்புள்ளி வைத்துள்ளனர்.
மேலும், அனிருத் இசையமைத்துள்ள ‘மனசிலாயோ’ முதல் பாடல் செப்டம்பர் 9-ம் தேதி வெளியாகும் என ‘வேட்டையன்’ படக்குழு தெரிவித்துள்ளது. தமிழ், தெலுங்கு, ஹிந்தி, கன்னடம் ஆகிய மொழிகளில் ஒரே நேரத்தில் ‘வேட்டையன்’ வெளியாகிறது.
