விஜய் தேவரகொண்டாவின் “கிங்டம்” படம் நாளை திரையரங்குகளில் வெளியாகவிருக்கிறது. இதில் ‘முருகன்’ எனும் கதாபாத்திரத்தில் நடித்துள்ளவர் வெங்கிடேஷ். கேரளாவைச் சேர்ந்த இவர், இந்த நிகழ்ச்சியின் ப்ரீ ரிலீஸ் நிகழ்வில் பேசியதன் மூலம் ரசிகர்களை கவர்ந்துள்ளார். தெலுங்கில் பேசியதோடு, தனது பயணத்தையும் உணர்ச்சியோடு பகிர்ந்தார். சிறு சிறு வாய்ப்புகளிலிருந்து ஒன்பது ஆண்டுகளுக்குப் பிறகு வெங்கிடேஷ் ஒரு பெரிய பட வாய்ப்பை பிடித்துள்ளார் என்பது சினிமா ரசிகர்களிடையே பெரும் வரவேற்பை பெற்றுள்ளது.
தனது வாழ்க்கைப் பாதையை வெளிப்படையாக கூறிய வெங்கிடேஷ், தமிழ் மற்றும் மலையாளத் திரைப்படங்களில் நடித்த பின்னர் தற்போது “கிங்டம்” படம் வாயிலாக புதிய பயணத்தைத் தொடங்கியுள்ளார். மேலும், ரஜினிகாந்தின் தீவிர ரசிகனாக இருப்பதையும், தனது குடும்பமே “தலைவர்” ரசிகர்கள் என்பதையும் தெரிவித்தார். அனிருத் இசையமைக்கும் படத்தில் நடிக்க வேண்டும் என கனவு கண்டவர், அதுவே தற்போது நடந்திருப்பதாக நெகிழ்ச்சியுடன் கூறினார்.
வெங்கிடேஷின் வாழ்க்கையின் மற்றொரு பக்கம் அவரது உணவக சேவையைச் சுற்றி அமைகிறது. “சுட சுட இட்லி” என்ற ஃபுட் டிரக் மூலம் கேரளாவின் திருவனந்தபுரத்தில் வீதியோரத்தில் இட்லி விற்பனை செய்து வருகிறார். 2024 ஆம் ஆண்டு முதல் இரவு நேரத்தில் தனது நண்பர்களுடன் இந்த சேவையை தொடர்கிறார். வெங்கிடேஷ் சுடும் இட்லிகளை சாப்பிட வேண்டுமென்று ரசிகர்கள் ஆர்வமாக இருக்கின்றனர். சினிமாவில் நடிக்க விரும்பும் ஆர்வத்தை விட்டுவிடாமல், உண்மையான வாழ்க்கையில் உழைத்து முன்னேறுவதை இந்த நடிகர் நிரூபித்துள்ளார்.
தற்போது வெங்கிடேஷின் பேச்சும், வாழ்க்கை முறையும் சமூக வலைதளங்களில் வைரலாகி வருகிறது. அவருடைய நடிப்பு திறமை மட்டுமின்றி, எளிமையான வாழ்க்கை முறை மற்றும் சாதனையைப் பார்க்கும் போது, ரசிகர்கள் மட்டும் அல்லாமல் இயக்குநர்களும் அவருக்காக வாய்ப்புகள் தேடி வருகின்றனர். “கிங்டம்” படத்தின் வெற்றியோடு வெங்கிடேஷின் இட்லி வணிகமும் சூடுபிடிக்க உள்ளதென எதிர்பார்க்கப்படுகிறது.
