சுகுமார் இயக்கத்தில் அல்லு அர்ஜுன், ராஷ்மிகா மந்தனா நடிப்பில் வெளியாகி வெற்றி பெற்ற படம் ‘புஷ்பா’. தேவிஸ்ரீ பிரசாத் இசையமைத்துள்ள இந்தப் படத்தின் அடுத்த பாகம் ‘புஷ்பா 2: தி ரூல்’ என்ற பெயரில் உருவாகி வருகிறது. டிச.5-ம் தேதி வெளியாகும் இந்தப் படத்தின் புரமோஷன் நிகழ்ச்சி சென்னையில் நடைபெற்றது. நிகழ்ச்சியில், தொகுப்பாளர் ராஷ்மிகாவிடம், “உங்கள் வருங்கால கணவர் திரையுலகைச் சேர்ந்தவரா அல்லது வெளியூரில் இருந்து வரப் போகிறாரா?” என்று கேட்டார்.
அதற்கு ராஷ்மிகா, “இதற்கான பதில் அனைவருக்கும் தெரிந்த ஒன்றுதான்” என்றார். நடிகர் விஜய் தேவரகொண்டாவும், ராஷ்மிகாவும் காதலிப்பதாக செய்திகள் வெளியாகியுள்ளன. இந்நிலையில், சமூக வலைதளங்களில் ட்ரெண்டாகி வரும் விஜய் தேவரகொண்டாவின் பெயரைக் குறிப்பிடாமல் முதன்முறையாக ராஷ்மிகா ஒப்புக்கொண்டுள்ளார்.
விழாவில் பேசிய அல்லு அர்ஜுன், நான் பிறந்த இந்த மண்ணை வணங்குகிறேன். ‘புஷ்பா 2’ படத்தின் புரமோஷனுக்காக பல வெளிநாடுகளுக்கு சென்றுள்ளேன். ஆனால் சென்னைக்கு வரும்போது ஏற்படும் உணர்வு வேறு. என் வாழ்க்கையின் முதல் 20 வருடங்களை சென்னையில் கழித்தேன். அதனால், வாழ்க்கையில் நான் எதைச் சாதித்தாலும், என் அடித்தளமாக இருக்கும் சென்னைக்கு நன்றி சொல்வேன். நான் சென்னை பையன். நான் நேஷனல் போகலாம், இன்டர்நேஷனல் போகலாம், எங்க போனாலும் சென்னை பையன். நான் எவ்வளவு சாதித்தாலும் அதை என் வேரான தமிழ் மண்ணுக்கு அர்ப்பணிப்பேன்,” என்றார்.
