நடிகர் ரவி மோகன் தனது திரையுலகப் பயணத்தில் புதிய அத்தியாயத்தை தொடக்க இருக்கிறார். இதுவரை ஹீரோவாக நடித்துவரும் அவர், தற்போது தயாரிப்பாளராகவும், விரைவில் இயக்குனராகவும் களமிறங்க உள்ளார். அவர் தயாரிக்கும் முதல் திரைப்படத்தில் தான் கதாநாயகனாக நடிக்கிறார். இந்தப் படத்தை ‘டிக்கிலோனா’ மற்றும் ‘வடக்குப்பட்டி ராமசாமி’ ஆகிய வெற்றிப்படங்களை இயக்கிய கார்த்திக் யோகி இயக்கவுள்ளார்.
இந்தப் புதிய படம் “Brocode” எனும் தலைப்பில் உருவாகும் என தகவல்கள் வெளியாகியுள்ளன. இதில் ரவி மோகனைத் தவிர நடிகர் எஸ்.ஜே. சூர்யா ஒரு முக்கிய பாசிட்டிவ் கதாபாத்திரத்தில் நடிக்கிறார். தற்போது வில்லனாக வெற்றிகரமாக நடித்து வரும் சூர்யா, இங்கு ஒரு நல்ல மனிதனாகவே வெளிவர இருப்பது ரசிகர்களுக்கு ஆச்சரியமளிக்கிறது.
படத்தில் நான்கு நாயகிகள் நடிக்க உள்ளனர், இதில் இருவர் பான் இந்திய நடிகைகள் என கூறப்படுகிறது. இசையமைப்பை ‘அனிமல்’ புகழ் ஹர்ஷவர்தன் பார்வா மேற்கொள்ள உள்ளார். மேலும் இரண்டு பான் இந்திய நடிகர்களுடன் பேச்சுவார்த்தைகள் நடைபெற்று வருகின்றன.
இந்த படத்தின் படப்பிடிப்பு செப்டம்பர் மாதத்தில் துவங்கும் என எதிர்பார்க்கப்படுகிறது. பிரம்மாண்ட முறையில் உருவாகும் இந்த படத்தில் காமெடி மற்றும் ஆக்ஷன் என இரண்டும் இணைந்து செல்வதாக கூறப்படுகிறது. கார்த்திக் யோகியின் காமெடி கைப்பழக்கம் மற்றும் ரவி மோகனின் ஆக்ஷன் திறமை இணையும் இந்தப் படம் ரசிகர்களிடையே மிகப்பெரிய எதிர்பார்ப்பை உருவாக்கியுள்ளது.
இதனுடன் ரவி மோகன் இயக்குனராகவும் அறிமுகமாக இருக்கிறார். யோகி பாபுவை நாயகனாக வைத்து அவர் இயக்கும் படம் ஆகஸ்ட் மாதத்தில் படப்பிடிப்பு தொடங்க இருக்கிறது. எனவே, நடிகராக துவங்கி தயாரிப்பாளர் மற்றும் இயக்குனராகவும் ரவி மோகன் முழுமையாக வளர்ந்து வருகிறார்.
அவர் தயாரிக்கும் முதல் படமும், இயக்கும் முதல் படமும் வெற்றிபெற வேண்டும் என்ற பெரும் எதிர்பார்ப்பு ரசிகர்களிடையே உருவாகியுள்ளது. ‘ஜெயம்’ மூலம் தனது பயணத்தைத் தொடங்கிய ரவி மோகன், தற்போது சினிமா உலகில் ஒரு ஆல்ரவுண்டர் ஆக மாறி வருகிறார்.
