சென்னை: ஒரு படத்தை முடித்துவிட்டு, ரிலீஸுக்கு காத்திருக்கும்போது அந்த படம் வெளியிட முடியாமல் போனால், அந்த இயக்குநருக்கு ஏற்படும் மனவேதனையை ரசிகர்கள் நிச்சயமாக அறிந்திருப்பார்கள். அதே சமயம், சியான் விக்ரம் ரசிகர்கள் காலை முதலே படத்தை பார்க்க தியேட்டர் வாசல்களில் காத்துக் கிடந்த போது, படம் 4 வாரங்களுக்கு வெளியிடப்பட மாட்டாது என்ற அதிர்ச்சி செய்தி வந்தது. இதனால், ரசிகர்கள் அதிர்ச்சியடைந்த நிலையில், தற்போது படக்குழு அனைத்து வேலைகளையும் செய்து, “வீர தீர சூரன்” படம் இன்று மாலை முதல் திரையரங்குகளில் வெளியாகும் என அறிவித்துள்ளது.
இந்த சம்பவம் தொடர்பாக, படத்தின் இயக்குநர் எஸ்.யூ. அருண் குமார் வீடியோ ஒன்றை வெளியிட்டு, “ரசிகர்களுக்கும் பொதுமக்களுக்கும் ஏற்பட்ட மன உளைச்சலுக்கு மன்னிப்பு கேட்கின்றேன்” என்று கூறினார். படம் துருவ நட்சத்திரம் போன்று ஆகிவிடுமோ என்று ரசிகர்கள் அஞ்சிக் கொண்டிருந்த நிலையில், இன்று மாலை முதல் அவர்கள் காளியின் ருத்ர தாண்டவத்தை திரையரங்குகளில் கண்டு ரசிக்கப் போகின்றனர்.
“வீர தீர சூரன்” படத்தை வெளியிடக் கூடாது என B4U நிறுவனம் வழக்கு தொடர்ந்த நிலையில், அதன் விசாரணை மீண்டும் தொடங்கியது. தயாரிப்பாளர் ஷிபு, தங்கள் தரப்பில் வாதம் முன்வைத்து, இருதப்பு பேச்சுவார்த்தைக்கு பிறகு செட்டில்மெண்ட் முடிவுக்கு வந்ததாக அறிவிக்கப்பட்டுள்ளது. மூன்று நாட்களுக்கு சேட்டிலைட் உரிம ஆவணங்கள் வழங்கப்படும் என்றும், 2.5 கோடி ரூபாயை ஒப்பந்த அடிப்படையில் வழங்கவும் ஒப்புதல் அளிக்கப்பட்டுள்ளது. இதற்கிடையே, டெல்லி உயர்நீதிமன்றம் படத்தின் ரிலீஸுக்கு விதிக்கப்பட்ட தடையை நீக்கியுள்ளது.
படத்தின் இயக்குநர் எஸ்.யூ. அருண் குமார், இப்படத்தை காலையில் வெளியிட முடியாது என்று தெரிந்தபோது அதிர்ந்தார். அவரது அப்பாவே மூன்று முறை தியேட்டருக்கு சென்று படம் பார்க்க முயற்சித்தும் முடியாமல் திரும்பியுள்ளார். அதேபோல், எத்தனையோ ரசிகர்கள் படம் பார்க்க சென்றும் ஏமாந்து திரும்பியுள்ளனர். இது குறித்து, “உங்களிடமிருந்து மன்னிப்பு கேட்கின்றேன்” என இயக்குநர் உருக்கமாக கூறினார்.
இதன் பிறகு, “வீர தீர சூரன்” படம் இன்று மாலை திரையரங்குகளில் வெளியிடப்படும் என்பதை உறுதிப்படுத்திய இயக்குநர், தனது படக்குழு மற்றும் தயாரிப்பாளர் சங்கத்திற்கு நன்றி தெரிவித்தார். இன்று மாலை முதல், ரசிகர்கள் படத்தை காணத் தியேட்டர்களை நோக்கி படையெடுக்கின்றனர்.
