இயக்குனர் கார்த்திக் சுப்புராஜ் இயக்கத்தில் சூர்யா நடித்த ‘ரெட்ரோ’ திரைப்படம் கடந்த வாரம் திரையரங்குகளில் வெளியானது. படம் கலவையான விமர்சனங்களை பெற்றிருந்தாலும், இந்தியாவிலேயே தற்போது வரை ரூ.43 கோடிக்கு மேல் வசூல் செய்துள்ளதாக தகவல்கள் தெரிவிக்கின்றன.
இதேவேளை, ஆன்லைனில் சில விமர்சனங்கள் மற்றும் மீம்கள் படத்தை கடுமையாக விமர்சித்து வருகின்றன. இதுபற்றி கருத்து தெரிவித்த இயக்குனர் கார்த்திக் சுப்புராஜ், “இந்தப் படத்தின் மூலம் ஆன்லைன் விமர்சனங்களைப் பார்க்கவே கூடாது என்பதைக் கற்றுக்கொண்டேன்” என நேர்காணலில் தெரிவித்துள்ளார்.
படம் வெளியாகிய பிறகு ரசிகர்கள் பலரும் “கனிமா” பாடல் முழுமையாக இடம்பெறாததையுமே குறை கூறி வந்தனர். ஒரே ஷாட்டில் எடுக்கப்பட்ட அந்த பாடலில் நடுப்பகுதியில் வசனங்களும் ஆக்ஷன் காட்சிகளும் வந்ததால், பாடல் மொத்தமாக அனுபவிக்க முடியவில்லை என்று அவர்கள் தெரிவித்தனர். இதனைச் தொடர்ந்து, இசையமைப்பாளர் சந்தோஷ் நாராயணன் உருவாக்கிய “கனிமா” பாடலின் முழு வெர்ஷனை கார்த்திக் சுப்புராஜ் தற்போது தனது எக்ஸ் (முந்தைய ட்விட்டர்) தளத்தில் வெளியிட்டுள்ளார்.
