தமிழ் சினிமாவில் தனது தனித்துவமான நகைச்சுவை நடிப்பால் ரசிகர்களை சிரிக்க வைத்த ரோபோ சங்கரின் திடீர் மறைவு திரைத்துறையையே உலுக்கியுள்ளது. மேடைக் கலைஞராக தொடங்கி, சின்னத்திரை வழியாக வெள்ளித்திரைக்கு வந்த அவர், மாரி உள்ளிட்ட பல படங்களில் நடித்தார். எப்போதும் சிரிப்போடு வாழ்ந்த ரோபோ சங்கர், நேற்று இரவு உடல்நலக்குறைவால் உயிரிழந்தார்.
அவரின் இறப்புக்குப் பிறகு வெளிவந்த தகவல்களில், அவருக்கு நிறைவேறாத ஒரு பெரிய ஆசை இருப்பதை நடிகை ஆர்த்தி கணேஷ்கர் வெளிப்படுத்தியுள்ளார். ரோபோ சங்கர், கமல் ஹாசனின் தீவிர ரசிகராக இருந்தார். எப்போதும் “ஆண்டவர், ஆண்டவர்” என்று போற்றிய அவர், தனது குடும்ப நிகழ்வுகளில் கமலை அழைப்பது வழக்கம். பேரனின் பெயரிடுதலையும் கமலிடம் செய்யச் சொல்லி மகிழ்ந்தார். அவரது இன்ஸ்டாகிராம் ப்ரொஃபைல் பிக்சரே கமல் கன்னத்தில் முத்தமிடும் புகைப்படமாக இருந்தது.
இந்த அளவுக்கு கமலை நேசித்த ரோபோ சங்கரின் மிகப் பெரிய ஆசை, ஒரே ஒரு காட்சியாவது அவருடன் சேர்ந்து நடிக்க வேண்டும் என்பதே. ஆனால் அந்த கனவு நிறைவேறாமல் போனது அவரின் ரசிகர்களையும், சக நடிகர்களையும் பெரிதும் வருத்தப்பட வைத்துள்ளது. ஆர்த்தி, “இந்த ஆசை நிறைவேறாதது தான் ரொம்ப கஷ்டம்” என்று செய்தியாளர்களிடம் பேசியுள்ளார்.
ரோபோ சங்கரின் மறைவு குறித்து கமல் ஹாசனும் தனது இரங்கலை பதிவு செய்தார். அவரின் “நாளை நமதே” என்ற ட்வீட் குறித்து விமர்சனங்கள் எழுந்தபோதும், அது அரசியல் சார்ந்த கருத்தே தவிர சங்கரின் மறைவை குறித்ததல்ல என்று அவரது ரசிகர்கள் விளக்கமளித்துள்ளனர். இருந்தாலும், கமலுடன் இணைந்து நடிக்க வேண்டும் என்ற ரோபோ சங்கரின் கனவு, இனி சினிமா வரலாற்றில் நிறைவேறாத ஆசையாகவே நிலைத்து நிற்கிறது.
