இன்றைய புதிய தலைமுறை ரசிகர்களுக்கு எஸ்.ஜே.சூர்யா ஒரு திறமையான நடிகராகவே தெரிந்திருக்கலாம். ஆனால் அவரை ஒரு இயக்குநராக அறிந்தவர்கள், அவரது திரைக்கதைக்கும், தைரியமான கதைத் தேர்வுகளுக்கும் பெரும் மரியாதை செலுத்துவார்கள். வாலி, குஷி, நியூ, இசை என தன்னை தொடர்ந்து சவால்கள் நிறைந்த கதைகளில் வெற்றிகரமாக நிலைத்தவர் சூர்யா.
அவரது இயக்குனராகிய முதல் படமான வாலி, அஜித்தின் இரட்டை வேடத்தில் எதிர்பாராத மனோவியல் திருப்பங்களைக் கொண்டு தமிழ்ச் சினிமாவில் புதிய வழியை உருவாக்கியது. அதில் அவர் காட்டிய துணிச்சலும், ‘குஷி’யில் கதையை டைட்டிலே சொல்வதற்கான தைரியமும் அப்போது யாரிடமும் கிடைக்கவில்லை. ‘நியூ’வில் விஞ்ஞான சிந்தனைகளை முன்வைத்து அதே நேரத்தில் வணிக வெற்றியும் பெற்றார்.
‘இசை’ படத்தில் மூன்று மணி நேரமும் கனவுக்காட்சியாக நடத்தி, இறுதியில் அதைப் பற்றிய பரபரப்பான ட்விஸ்டுடன் முடித்தது, தமிழ் சினிமா பார்வையாளர்களுக்கு ஏதோ வித்தியாசமான ஒன்றைத் தந்தது. அந்த திரைப்படம் வெளியான வேளையில் சரியான அங்கீகாரம் பெறவில்லை என்றாலும், தற்போது அது கல்ட் ஸ்டேட்டஸைப் பெற்றிருக்கிறது.
தற்போது, சூர்யா மீண்டும் இயக்கத்துக்கு வந்துள்ளார். ‘கில்லர்’ என்னும் புதிய படத்தில், ஏ.ஆர். ரஹ்மானுடன் இணைகிறார். இது ரசிகர்களிடையே பெரும் எதிர்பார்ப்பை ஏற்படுத்தியுள்ளது. தமிழ் சினிமா தற்போது ஒரே மாதிரியான கட்டமைப்பில் மாட்டிக்கொண்டிருக்கிறது என்ற எண்ணத்தில், சூர்யாவைப்போன்ற தைரியமான இயக்குநர்கள் மீண்டும் இயக்கத்திற்கு வரவேண்டும் என்ற எதிர்பார்ப்பு உருவாகியுள்ளது.
தனது பிறந்த நாளான இன்று, ரசிகர்களும், சினிமா ஆர்வலர்களும் ஒரு விஷயத்தில் ஒருமனதாக உள்ளனர் – எஸ்.ஜே. சூர்யா இயக்குநராக தொடர வேண்டும்! அவர் தொடர்ந்தால்தான், புதிய இயக்குநர்களும் வித்தியாசமான பாணியைக் கடந்து சவால்களை எடுக்க தைரியமடைவார்கள்.
