2023ஆம் ஆண்டுக்கான 71வது தேசிய திரைப்பட விருதுகள் டில்லியில் அறிவிக்கப்பட்டுள்ளன. இந்த அறிவிப்பில் தமிழ்த் திரைப்படம் “பார்க்கிங்” மூன்று முக்கியமான பிரிவுகளில் விருதுகளுக்கு தேர்வு செய்யப்பட்டுள்ளது. நடிகர் ஹரீஷ் கல்யாண் நடித்த இந்த படத்திற்கு சிறந்த தமிழ் மொழிப் படம் என்ற அங்கீகாரம் கிடைத்துள்ளது. மேலும், படத்தின் இயக்குநர் ராம்குமார் பாலகிருஷ்ணனுக்கு சிறந்த திரைக்கதை எழுத்தாளராக விருது வழங்கப்பட்டுள்ளது. துணை நடிகர் பிரிவில், M.S.பாஸ்கர் தனது திறமையான நடிப்புக்காக தேசிய விருது பெற்றுள்ளார்.
மத்திய அரசு ஆண்டுதோறும் திரைப்பட துறையில் சிறந்து விளங்கும் படைப்பாளிகளை தேர்ந்தெடுத்து விருது வழங்கி வருவது வழக்கம். அந்தவகையில், இந்த ஆண்டின் சிறந்த திரைப்படமாக ஹிந்தி மொழியில் வெளியான “12த் பெயில்” தேர்வு செய்யப்பட்டது. அதேபோல், பொழுதுபோக்கு சித்திரமாக “ராக்கி அவுர் ராணி கீ பிரேம் கஹானி” தேர்வு பெற்றது. சிறந்த நடிகராக ஷாரூக் கான் மற்றும் விக்ராந்த் மாசே இருவரும் தேர்வாகினர். நடிகை ராணி முகர்ஜி, “மிசஸ் சட்டர்ஜி வெர்சஸ் நார்வே” படத்தில் செய்த நடிப்புக்காக சிறந்த நடிகை விருதை பெற்றுள்ளார்.
இசையமைப்பாளர் விருதிற்கும் தமிழ் பெருமை சேர்க்கப்பட்டுள்ளது. தனுஷ் நடித்த “வாத்தி” படத்திற்கு இசையமைத்த ஜி.வி.பிரகாஷ் குமார், மற்றும் “அனிமல்” படத்துக்காக ஹர்ஷவர்தன் ராமேஷ்வர் ஆகியோர் தேர்வு செய்யப்பட்டுள்ளனர். மலையாள மொழியில், “பூக்காலம்” படத்தில் நடித்த விஜயராகவன் சிறந்த துணை நடிகராகவும், “உள்ளொழுக்கு” படத்தில் ஊர்வசி சிறந்த துணை நடிகையாகவும் தேர்வாகினர்.
திரைப்படம் அல்லாத ஆவணப்பட வகையில் தமிழில் உருவான “லிட்டில் விங்க்ஸ்” சிறந்த ஒளிப்பதிவுக்கான விருதை பெற்றுள்ளது. இந்த ஆவணப்படத்திற்கு சரவண மருது சவுந்திர பாண்டி மற்றும் மீனாட்சி சோமன் ஒளிப்பதிவு செய்திருந்தனர். மேலும், “தி டைம்லெஸ் தமிழ்நாடு” என்ற ஆங்கில ஆவணப்படம், சிறந்த கலை கலாசார ஆவணப்படத்துக்கான விருதை பெற்றது. இந்த ஆண்டின் தேசிய விருதுகள் தமிழ்சினிமாவின் தரத்தை நாடு முழுக்க மிளிரவைத்திருக்கின்றன.
