நடிகர் சசிகுமார் மற்றும் சிம்ரன் நடித்த ‘டூரிஸ்ட் ஃபேமிலி’ திரைப்படம் மே 1ஆம் தேதி திரையரங்குகளில் வெளியாகி, பார்வையாளர்களிடையே நல்ல வரவேற்பைப் பெற்றது. இயக்குநர் அபிஷன் ஜீவிந்த் இயக்கிய இந்த படம் தற்போது ஓடிடி ரிலீஸுக்கு தயாராகியுள்ளது. படக்குழு வெளியிட்ட அதிகாரப்பூர்வ தகவலின்படி, ‘டூரிஸ்ட் ஃபேமிலி’ திரைப்படம் ஜூன் 2ஆம் தேதி ஜியோஹாட்ஸ்டார் தளத்தில் வெளியாக இருக்கிறது.
இத்திரைப்படத்தில் இலங்கையை சேர்ந்த அகதிகளாக சசிகுமார், சிம்ரன் தம்பதிகள் மற்றும் அவர்களது இரண்டு பிள்ளைகள் ராமேஸ்வரம் வந்து, அங்கிருந்து சென்னைக்கு இடம்பெயருகிறார்கள். சிம்ரனின் அண்ணன் யோகிபாபுவின் உதவியுடன் அவர்கள் வாழ்க்கையை மீண்டும் தொடங்க முயலுகிறார்கள். வேலை தேடி சசிகுமார் கடைசியில் கார் டிரைவராக சேர்ந்தபின், ராமேஸ்வரத்தில் நடந்த குண்டுவெடிப்பு சம்பவம் அவர்களின் அமைதியான வாழ்க்கையை மாற்றி அமைக்கிறது. சந்தேகத்தின் பேரில் போலீசார் அவர்களைக் கண்காணிக்க, அவர்கள் மீதான அழுத்தம் அதிகரிக்கிறது.
இந்தப் பின்னணியில், அகதிகளின் உண்மையான நிலை, அவர்களது மரபும், மொழியும், அடையாளமும் கேள்விக்குள்ளாகின்றன. “இந்தத் தமிழ் பேசுவதுதான் பிரச்சினையா?” என்கின்ற வசனம், படம் வெளிவந்தவுடன் சமூக வலைதளங்களில் பரவலாக பேசப்பட்டது. காதல், நகைச்சுவை, உணர்ச்சி மற்றும் சமூக சிந்தனையை ஒன்றாக இணைத்த இந்த திரைப்படம் பார்வையாளர்களை ஈர்த்தது.
இயக்குநர் அபிஷன் ஜீவிந்த் எடுத்துக்கொண்டது கடினமான கதையாக இருந்தாலும், அதை அழகாகவும் இயல்பாகவும் படமாக்கியுள்ளார் என விமர்சனங்கள் தெரிவித்தன. சசிகுமார், சிம்ரன், யோகிபாபு, எம்.எஸ். பாஸ்கர், ரமேஷ் திலக், பகவதி, ஸ்ரீஜா ரவி உள்ளிட்டோர் முக்கிய வேடங்களில் நடித்திருந்தனர். ஷான் ரோல்டன் இசையமைத்திருந்த இந்த படத்திற்கு பின்னணி இசை மிகுந்த பலம் என்றே கூறப்பட்டது.
தற்போது படம் திரையரங்குகளில் வெற்றிகரமாக ஓடி 28 நாட்கள் கடந்துள்ள நிலையில், இது வரை 57.79 கோடி ரூபாய் வசூலித்துள்ளது என்று Sacnilk தளம் தெரிவித்துள்ளது. இதனைத் தொடர்ந்து ஓடிடி பார்வையாளர்களும் எதிர்பார்க்கும் வகையில் ஜியோஹாட்ஸ்டார் ரிலீஸ் தேதி அதிகாரப்பூர்வமாக அறிவிக்கப்பட்டுள்ளது.
இப்படத்தின் வெற்றியை தொடர்ந்து, நடிகர் ரஜினிகாந்தும் தனிப்பட்ட முறையில் பாராட்டியதாக சசிகுமார் தனது எக்ஸ் (முன்னாள் ட்விட்டர்) பக்கத்தில் குறிப்பிட்டிருந்தார். “தர்மதாஸாகவே வாழ்ந்திருக்கீங்க, கலங்கடிச்சீங்க, சமீபகாலமா உங்களோட கதைத்தேர்வு வியக்க வைக்குது” என ரஜினி தெரிவித்த பாராட்டு, படக்குழுவுக்கு கூடுதல் ஊக்கமாக அமைந்தது.
‘டூரிஸ்ட் ஃபேமிலி’ திரைப்படம் வெளியான பிறகு, சமூக விழிப்புணர்வையும் மனித நேயத்தையும் வெளிக்கொணரும் ஒரு தரமான திரைப்படமாக பாராட்டப்படுகிறது. தற்போது ஓடிடியில் இப்படம் வெளியாக உள்ளதால், திரையரங்குகளில் தவற விட்டவர்கள் ஜியோஹாட்ஸ்டார் மூலம் அதை பார்க்கும் வாய்ப்பு பெற இருக்கின்றனர்.
