சென்னை: விஜய் நடித்துள்ள ‘தி கோட்’ படத்தின் 3வது சிங்கிள் பாடல் ஆகஸ்ட் 3ம் தேதி வெளியாகும் என அறிவிக்கப்பட்டுள்ளது.விஜய்யின் 68வது படத்தை வெங்கட் பிரபு இயக்குகிறார். ‘தி கிரேட்டஸ்ட் ஆஃப் ஆல் டைம்’ எனப் பெயரிடப்பட்டுள்ள இந்தப் படத்தை ஏஜிஎஸ் நிறுவனம் தயாரித்துள்ளது. இப்படத்திற்கு யுவன் ஷங்கர் ராஜா இசையமைத்துள்ளார்.
இதில் விஜய் 2 வேடங்களில் நடித்துள்ளார். இதன் படப்பிடிப்பு கடந்த அக்டோபர் மாதம் சென்னையில் பூஜையுடன் தொடங்கியது. இப்படத்தில் மீனாட்சி சவுத்ரி கதாநாயகியாக நடித்துள்ளார். மேலும், பிரசாந்த், மோகன், பிரபுதேவா, சினேகா, லைலா, ஜெயராம் மற்றும் பலர் முக்கிய வேடங்களில் நடித்துள்ளனர். இப்படத்தின் படப்பிடிப்பு இறுதிக்கட்டத்தை எட்டியுள்ளது.
படத்தின் முதல் சிங்கிள் ‘விசில் போடு’ வெளியாகி ரசிகர்களிடம் கலவையான விமர்சனங்களைப் பெற்றது. விஜய் பிறந்தநாளை முன்னிட்டு ‘சின்ன சின்ன கன்னிஸ்’ என்ற இரண்டாவது சிங்கிள் பாடல் வெளியாகியுள்ளது. மறைந்த பாடகி பவதாரிணியின் குரலை AI மீண்டும் உருவாக்கி பாடல் வெளியிடப்பட்டது. இந்நிலையில் இப்படத்தின் 3வது சிங்கிள் பாடல் ஆகஸ்ட் 3ம் தேதி வெளியாகும் என அறிவிக்கப்பட்டுள்ளது. இப்படம் செப்டம்பர் 5ஆம் தேதி திரைக்கு வரவுள்ளது.
