மெல்பர்ன்: இந்திய கிரிக்கெட் அணி ஆஸ்திரேலியாவில் சுற்றுப்பயணம் செய்து விளையாடி வருகிறது. பெர்த்தில் நடந்த இரு அணிகளுக்கு இடையிலான முதல் டெஸ்ட் போட்டியில் இந்திய அணி 296 ரன்கள் வித்தியாசத்தில் அபார வெற்றி பெற்றது. அடிலெய்டில் நடந்த இரண்டாவது டெஸ்ட் போட்டியில் ஆஸ்திரேலிய அணி 10 விக்கெட் வித்தியாசத்தில் வெற்றி பெற்று பதிலடி கொடுத்தது. இதையடுத்து பிரிஸ்பேனில் நடந்த மூன்றாவது டெஸ்ட் போட்டி டிராவில் முடிந்தது.
ஒரு ஆச்சரியமான நடவடிக்கையாக, இந்திய அணியின் சுழற்பந்து வீச்சாளர் ரவிச்சந்திரன் அஸ்வின் பிரிஸ்பன் போட்டியின் முடிவில் தனது ஓய்வை அறிவித்தார். இந்நிலையில் இந்திய அணியில் அஸ்வினுக்கு பதிலாக 26 வயதான சுழற்பந்து வீச்சாளர் ஆல்ரவுண்டர் தனுஷ் கோட்டியன் சேர்க்கப்பட்டுள்ளார். மும்பையைச் சேர்ந்த தனுஷ் கோட்டியன் தற்போது அகமதாபாத்தில் விஜய் ஹசாரே தொடரில் விளையாடி வருகிறார். இன்று ஆஸ்திரேலியா செல்லும் தனுஷ் கோட்டியான், வரும் 26-ம் தேதி மெல்பர்னில் தொடங்கும் பாக்சிங் டே டெஸ்ட் போட்டிக்கு முன்னதாக இந்திய அணியில் இணைகிறார்.
சமீபத்தில் மெல்பர்ன் கிரிக்கெட் மைதானத்தில் ஆஸ்திரேலியா ‘ஏ’ அணிக்கு எதிரான போட்டியில், தனுஷ் கோட்டியன் 8-வது இடத்தில் பேட் செய்து 44 ரன்கள் எடுத்தார். 33 முதல் தர போட்டிகளில் விளையாடி 101 விக்கெட்டுகள் மற்றும் 2 சதங்களுடன் 1,525 ரன்கள் எடுத்துள்ளார். இந்திய அணியில் அஸ்வினுக்கு பதிலாக இடது கை சுழற்பந்து வீச்சாளர் அக்சர் படேல் இடம்பிடித்துள்ளார். இருப்பினும், விஜய் ஹசாரே தொடரின் முதல் 2 போட்டிகளில் விளையாடிய பிறகு தனிப்பட்ட காரணங்களுக்காக அவர் ஓய்வு கோரியிருந்தார்.
இதன் காரணமாக தனுஷ் கோட்டியன் தேர்வு செய்யப்பட்டுள்ளார். இது தவிர, கடைசி நிமிடத்தில் ஜடேஜா மற்றும் வாஷிங்டன் சுந்தர் காயம் அடைந்தால் அவர்களுக்கு மாற்று வீரர் தேவைப்படுவதால் தனுஷ் கோட்டியன் தேர்வு செய்யப்பட்டு ஆஸ்திரேலியாவுக்கு அனுப்பப்படுவார் என்று பிசிசிஐ அதிகாரி ஒருவர் தெரிவித்தார்.
