மும்பை வான்கடே மைதானத்தில் இந்திய வீரர்கள் மற்றும் ரசிகர்கள் வந்தே மாதரம் பாடலை பாடும் வீடியோ தற்போது இணையத்தில் வைரலாகி வருகிறது.
டி20 உலக கோப்பை கிரிக்கெட் போட்டியின் இறுதி ஆட்டத்தில் இந்தியா மற்றும் தென்னாப்பிரிக்கா அணிகள் மோதின. இதில் இந்திய அணி 7 விக்கெட் வித்தியாசத்தில் தென் ஆப்பிரிக்காவை வீழ்த்தி சாம்பியன் பட்டம் வென்றது. உலக கோப்பையை வென்ற இந்திய அணி நேற்று தனி விமானத்தில் நாடு திரும்பியது.
பின்னர் இந்திய வீரர்கள் பிரதமர் மோடியை சந்தித்து தங்களது மகிழ்ச்சியை வெளிப்படுத்தி புகைப்படம் எடுத்துக் கொண்டனர். மும்பை வான்கடே மைதானத்தில் இந்திய வீரர்களுக்கு பாராட்டு விழா மற்றும் கொண்டாட்டங்கள் ஏற்பாடு செய்யப்பட்டிருந்தது.
இதனை முன்னிட்டு இந்திய வீரர்கள் திறந்தவெளி வாகனத்தில் கோப்பையுடன் வான்கடே மைதானத்திற்கு புறப்பட்டனர். அப்போது மும்பையில் உள்ள மரைன் டிரைவ் சாலையில் திரண்டிருந்த ரசிகர்கள் அலை மோதி இந்திய வீரர்களுக்கு உற்சாக வரவேற்பு அளித்தனர். எங்கும் கூட்டம். கிரிக்கெட் வீரர்களை கையில் கொடிகளுடன் உற்சாகமாக வரவேற்றனர்.
இந்திய வீரர்கள் சென்ற வாகனம் கட்டுக்கடங்காத கூட்டத்தால் ஆமை வேகத்தில் நகர்ந்து மும்பை வான்கடே மைதானத்தை அடைந்தது. அப்போது இந்திய வீரர்கள் உலக கோப்பையை கையில் ஏந்தியவாறு மைதானத்தை சுற்றி வந்து ரசிகர்களை உற்சாகப்படுத்தினர்.
நிகழ்ச்சியில் ஏ.ஆர்.ரஹ்மானின் ‘வந்தே மாதரம்’ என்ற தேசபக்தி பாடல் இசைக்கப்பட்டது. இந்திய வீரர்களும், ரசிகர்களும் இணைந்து இந்தப் பாடலைப் பாடியதால் அரங்கமே உணர்ச்சிப் பெருக்கால் நிறைந்தது. பிசிசிஐ வெளியிட்டுள்ள இந்த வீடியோ தற்போது இணையத்தில் வைரலாகி வருகிறது.
