ராஜ்கிர்: ஆசிய கோப்பை ஹாக்கி போட்டியின் லீக் போட்டியில் இந்திய ஆண்கள் அணி சிறப்பாக விளையாடி ஜப்பான் அணியை வீழ்த்தியது. பீகாரின் ராஜ்கிரில் போட்டிகள் நடைபெற்று வருகின்றன. இந்நிலையில், நேற்று மதியம் நடைபெற்ற குரூப் ஏ லீக் போட்டியில் இந்திய மற்றும் ஜப்பான் அணிகள் மோதின.
இதில், இந்திய அணி வீரர்கள் சிறப்பாக விளையாடி ஜப்பான் அணியை 3-2 என்ற கோல் கணக்கில் தோற்கடித்தனர். இந்திய அணிக்காக கேப்டன் ஹர்மன்ப்ரீத் 5வது மற்றும் 46-வது நிமிடங்களில் கோல் அடித்தார்.
இந்திய வீரர் மன்தீப் சிங் 4-வது நிமிடத்தில் ஒரு கோல் அடித்தார். ஜப்பான் அணிக்காக கோசி கவாபே 38-வது மற்றும் 59-வது நிமிடங்களில் கோல் அடித்தார். கடந்த வெள்ளிக்கிழமை நடைபெற்ற இந்த போட்டியின் முதல் லீக் போட்டியில், இந்திய அணி சீனாவை 4-3 என்ற கோல் கணக்கில் தோற்கடித்தது.
இந்நிலையில், இன்று இந்தியா மற்றும் கஜகஸ்தான் அணிகள் மோதும் கடைசி லீக் போட்டி நடைபெறும்.
