பியூனஸ் அயர்ஸ்: 2026 ஃபிஃபா உலகக் கோப்பை தகுதிச் சுற்றில் பொலிவியாவுக்கு எதிராக மெஸ்ஸி ஹாட்ரிக் கோல் அடித்தார். இப்போட்டியில் அர்ஜென்டினா 6-0 என்ற கோல் கணக்கில் வெற்றி பெற்றது.
தென் அமெரிக்க நாடுகளுக்கு இடையிலான தகுதிச் சுற்று ஆட்டம் அர்ஜென்டினாவில் நடைபெற்றது. 37 வயதான சூப்பர் ஸ்டார் லியோனல் மெஸ்சி, கணுக்காலில் ஏற்பட்ட காயம் காரணமாக சமீபகால போட்டிகளில் விளையாடாமல் இருந்தவர், சமீபத்தில் அணிக்கு திரும்பினார்.
இதில் மெஸ்ஸி 19, 84 மற்றும் 86-வது நிமிடங்களில் கோல் அடித்தார். சக வீரர்களுக்கு 2 கோல்கள் அடிக்க உதவினார். அதன் மூலம் தனது அபார ஆட்டத்திறனை வெளிப்படுத்தியிருந்தார்.
மெஸ்ஸியின் இரண்டாவது கோல் கிளாசிக் கோல். அவர் தனது இடது காலில் இருந்து வலது கால் வரை பந்தை டிரிபிள் செய்து கோல் கம்பத்தின் வலது பக்கம் (கீழ்புறம்) தள்ளி கோல் அடித்தார். அடுத்த இரண்டு நிமிடங்களில் மூன்றாவது கோலை அடித்தார்.
அர்ஜென்டினாவின் மார்டினெஸ், அல்வரஸ், தியாகோ ஆகியோரும் 45, 45 (+3), 69-வது நிமிடங்களில் கோல் அடித்தனர். இந்த வெற்றியின் மூலம் தென் அமெரிக்க நாடுகளுக்கு இடையிலான 10 அணிகள் பங்கேற்கும் ஃபிஃபா உலகக் கோப்பை கால்பந்து தொடருக்கான தகுதிச் சுற்றில் அர்ஜென்டினா 10 போட்டிகளில் விளையாடி 22 புள்ளிகளைப் பெற்றுள்ளது.
இதன் மூலம் அந்த அணி பட்டியலில் முதலிடத்தில் உள்ளது. தற்போதைய உலக சாம்பியன் அர்ஜென்டினா என்பது குறிப்பிடத்தக்கது. 2026 ஃபிஃபா உலகக் கோப்பை கால்பந்து தொடர் கனடா, மெக்சிகோ மற்றும் அமெரிக்காவில் நடைபெறவுள்ளது.
