துபாய்: நடந்து வரும் ஆசிய கோப்பை டி20 கிரிக்கெட் தொடரின் இறுதிப் போட்டியில் இந்தியாவும் பாகிஸ்தானும் மோத உள்ளன. இந்த சூழலில், பாகிஸ்தான் அணி இறுதிப் போட்டிக்கு முன்னேறிய பிறகு அணியின் பயிற்சியாளர் மைக் ஹெசன் ஊடகங்களை சந்தித்தார். அந்த நேரத்தில், “இந்திய அணிக்கு எதிரான இறுதிப் போட்டியில் கிரிக்கெட்டில் மட்டுமே கவனம் செலுத்த வேண்டும்.
நாங்கள் எங்கள் சிறந்த ஆட்டத்தை வெளிப்படுத்த வேண்டும். இதுபோன்ற அழுத்தமான போட்டிகளில் அதுதான் மிக முக்கியமான விஷயம் என்று நான் நினைக்கிறேன். ஒரு சரிவுக்குப் பிறகு வரும் வெற்றி அணிக்கு நம்பிக்கையைத் தரும். கடந்த சில மாதங்களாக நாங்கள் நிறைய போட்டிகளில் வெற்றி பெற்றுள்ளோம். இந்த அணிக்கு அந்தத் திறன் உள்ளது. அணியில் உள்ள ஒவ்வொரு வீரரும் அதைச் செய்ய முடியும் என்று நம்புகிறார்கள்.
பாகிஸ்தான் அணிக்காக விளையாடுவதில் அவர்கள் பெருமைப்படுகிறார்கள். வங்கதேச அணிக்கு எதிரான போட்டியில் அணி 4 விக்கெட்டுக்கு 33 ரன்கள் எடுத்திருந்தது. பேட்டிங்கில் எங்கள் அணி முன்னேற வேண்டும். குறிப்பாக டாப் ஆர்டருக்கு அதிக பங்களிப்பு தேவை. வங்கதேச அணிக்கு எதிரான ‘சூப்பர் 4’ போட்டியில், ஆக்ரோஷமான ஷாட் விளையாட முயன்றபோது ஒரு விக்கெட்டை இழந்தோம் என்பதை கவனத்தில் கொள்ள வேண்டும்.
இந்தத் தொடரில் எங்கள் அணி லீக் சுற்றில் இந்திய அணிக்கு எதிராக விளையாடுவதற்கும் சூப்பர் 4 சுற்றில் விளையாடுவதற்கும் வித்தியாசம் இருந்தது. முதல் போட்டியை விட இரண்டாவது போட்டியில் எங்கள் ஆட்டம் சிறப்பாக இருந்தது. முதல் போட்டியில் இந்தியா ஆட்டத்தின் மீது கட்டுப்பாட்டில் இருந்தது. ஆனால் இரண்டாவது போட்டியில் அப்படி இல்லை. அவர்கள் ஒரு சிறந்த இன்னிங்ஸை விளையாடினார்கள்.
அபிஷேக் சர்மா “எங்களிடமிருந்து ஆட்டத்தை பறித்துவிட்டார்கள். இந்திய அணிக்கு அழுத்தம் கொடுக்கும் திறன் எங்களிடம் உள்ளது. இந்தத் தொடரில் இந்திய அணிக்கு எதிராக எங்கள் மூன்றாவது போட்டியில் நாங்கள் விளையாடுகிறோம். இறுதிப் போட்டியில் விளையாட இந்த வாய்ப்புக்கு நாங்கள் தகுதியானவர்கள். இறுதிப் போட்டியில் யார் வெல்வார்கள் என்பதுதான் முக்கியம். அதுதான் கணக்கில் எடுத்துக்கொள்ளப்படும்,” என்று ஹெசன் கூறினார்.
