முல்லான்பூரில் நடைபெற்ற ஐபிஎல் 2025 பிளே ஆஃப் சுற்றின் முதல் தகுதிச் சுற்றுப் போட்டியில், பஞ்சாப் கிங்ஸ் அணியை வீழ்த்தி ராயல் சேலஞ்சர்ஸ் பெங்களூரு (ஆர்சிபி) அணி வெற்றிபெற்றது. இந்த வெற்றிக்குப் பிறகு, கோப்பையை வெல்வதற்கான வாய்ப்பு ஆர்சிபிக்கே என்ற எதிர்பார்ப்பு ரசிகர்களிடையே உருவாகியுள்ளது.
இதற்குக் காரணமாக கடந்த ஏழு ஆண்டுகளில் ஏற்பட்ட ஒரு விசேஷமான புள்ளிவிவரம் உள்ளது. 2018 முதல் 2024 வரை, பிளே ஆஃப் சுற்றில் முதல் தகுதிச் சுற்றுப் போட்டியில் வெற்றி பெற்ற அணிகள் அனைத்தும் இறுதிப் போட்டியிலும் வெற்றி பெற்று கோப்பையை கைப்பற்றியுள்ளன.
இதற்கு முந்தைய 2017 ஆண்டு, ரைசிங் புனே சூப்பர் ஜெயன்ட்ஸ் அணி முதல் தகுதிச் சுற்றைப் வென்றும், இறுதிப் போட்டியில் தோல்வியடைந்தது. அந்த ஆண்டுக்குப் பிறகு தொடர்ச்சியாக, முதல் தகுதிச் சுற்றில் வெற்றி பெற்ற அணிகள் கோப்பை பெற்றுள்ளன.
ஆர்சிபி கடந்த முறையாக 2016ல் இத்தகைய வாய்ப்பை பெற்றிருந்தது. குஜராத் லயன்ஸ் அணியை வீழ்த்தி பைனலில் நுழைந்தாலும், இறுதியில் சன்ரைசர்ஸ் ஹைதராபாத்திடம் தோல்வியடைந்தது.
இந்த ஆண்டு, ஆர்சிபி மீண்டும் அதே நிலையை சந்திக்கவுள்ளது. ஆனால் இந்த முறை, கடந்த ஏழு ஆண்டுகளாக நிலவும் புள்ளிவிவரம் அவர்களுக்கு சாதகமாக அமையுமா என்பதுதான் ரசிகர்களின் எதிர்பார்ப்பு.
முந்தைய முறைகளைப் போல், இந்த ஆண்டு கூட முதல் தகுதிச் சுற்றுப் போட்டி வெற்றியாளர் கோப்பையை வெல்லும் எனில், ஆர்சிபிக்கு இது முதல் ஐபிஎல் வெற்றியாக அமையலாம்.
தற்போது, மும்பை இந்தியன்ஸ் மற்றும் குஜராத் டைட்டன்ஸ் இடையிலான எலிமினேட்டர் போட்டி நடைபெற உள்ளது. இதில் வெற்றி பெறும் அணி பஞ்சாப் கிங்ஸை எதிர்த்து இரண்டாவது தகுதிச் சுற்றில் விளையாடும்.
அதில் வெற்றி பெறும் அணி ஆர்சிபியுடன் இறுதிப் போட்டியில் மோதவுள்ளது. வரலாற்றை மீண்டும் எழுத ஆர்சிபிக்கு கிடைத்திருக்கும் இந்த வாய்ப்பு, ரசிகர்களிடையே பெரும் ஆவலையும் நம்பிக்கையையும் ஏற்படுத்தியுள்ளது.
