இந்த ஆண்டு இந்தியாவில் நடைபெற்று வரும் 2025 ஐபிஎல் கிரிக்கெட் தொடரில் 14 வயதான வைபவ் சூர்யவன்ஷியின் அறிமுகம் ரசிகர்களிடையே பெரும் சுவாரஸ்யத்தையும் கவனத்தையும் ஈர்த்திருக்கிறது. கடந்த ஆண்டு நடைபெற்ற ஐபிஎல் ஏலத்தில் 30 லட்சம் ரூபாயை அடிப்படையாகக் கொண்டு பங்கேற்ற அவரை, ராஜஸ்தான் ராயல்ஸ் அணி 1 கோடியே 10 லட்ச ரூபாய்க்கு வாங்கியது பெரும் அதிர்வலைகளை ஏற்படுத்தியது.
இளம்வயதான இவர் உடனே வாய்ப்பு பெறுவாரா என்ற கேள்விகள் எழுந்தபோதும், அணியின் கேப்டன் சஞ்சு சாம்சன் காயம் காரணமாக லக்னோவுக்கு எதிரான போட்டியில் வைபவ் அறிமுகமானார். அப்போதே தனது முதல் பந்திலேயே சிக்சர் அடித்து ரசிகர்களின் மனதில் இடம் பிடித்தார். அந்தப் போட்டியில் 34 ரன்கள் அடித்தும் அனைவரின் பாராட்டைப் பெற்றார். தொடர்ந்து ஆர்.சி.பி. அணிக்கு எதிராகவும் விளையாடிய வைபவ், 12 பந்துகளில் 2 சிக்சர்களுடன் 16 ரன்கள் எடுத்தார். அவரது சிக்ஸ் ஹிட்டிங் திறனும் நேர்த்தியான ஷாட்டுகளும் ரசிகர்களையும் முன்னணி கிரிக்கெட் நிபுணர்களையும் ஈர்த்தன.
இந்நிலையில், இந்தியாவின் முன்னாள் வீரர் வீரேந்திர சேவாக், இளம் வயதில் விளையாடி வருவதைப் பார்த்து மகிழ்ச்சி தெரிவித்ததோடு, வைபவ் சூர்யவன்ஷிக்கு சில முக்கியமான அறிவுரைகளையும் வழங்கியுள்ளார். அவர் கூறியதாவது, “என் பார்வையில் வைபவ் இன்னும் 20 ஆண்டுகள் ஐபிஎல்லில் விளையாட வேண்டும். விராட் கோலி தனது ஐபிஎல் பயணத்தை 19 வயதில் தொடங்கி இப்போது 18 ஆண்டுகளாக விளையாடி வருகிறார். வைபவும் அவரைப்போல் தொடர்ந்து விளையாட வேண்டும்.”
அதையடுத்து சேவாக் மேலும் தெரிவித்துள்ளார், “ஐபிஎல் தான் போதும், இதில் கோடிகள் சம்பாதிக்கலாம் என்று நம்பினால் அது அவருடைய வளர்ச்சிக்கு தடையாக மாறும். முதல் பந்திலேயே சிக்சர் அடித்ததற்காக தன்னை ஸ்டார் என்று நினைத்துக் கொண்டால், அடுத்த ஆண்டு அவரை காணவே முடியாமல் போய்விடும். எனவே எந்த ஒரு புகழையும் தலைக்கு ஏற்றிக் கொள்ளாமல், தனது பேட்டிங் மீது கவனம் செலுத்தி தொடர்ந்து கடுமையாக உழைத்தால், நிச்சயம் 20 ஆண்டுகள் இந்த போட்டியில் விளையாட முடியும்.”
சேவாக் கூறிய இந்த வார்த்தைகள், இளம் வீரர்களுக்கான உண்மையான வழிகாட்டி என்றே கூறலாம். வயதில் சிறியவராக இருந்தாலும், திறமையால் ரசிகர்களின் நம்பிக்கையை வென்ற வைபவ், இந்த அறிவுரைகளை பின்பற்றி தன்னுடைய இடத்தை இந்திய கிரிக்கெட்டில் நிலைப்பாரா என்பது தற்போது எதிர்பார்ப்பாக உள்ளது.
