லண்டனில் நடைபெற்று வரும் விம்பிள்டன் கிராண்ட்ஸ்லாம் டென்னிஸ் தொடரின் மூன்றாம் நாள் போட்டிகள் மழையால் தாமதமாக துவங்கினாலும், விளையாட்டு ரசிகர்களுக்குப் பல ஆச்சரியங்கள் மற்றும் அதிர்ச்சிகளை ஏற்படுத்தியது. பெண்கள் ஒற்றையர் பிரிவில் உலகின் நம்பர்-1 வீராங்கனை அரினா சபலென்கா, செக் வீராங்கனை மேரி பவுஸ்கோவாவை நேர்செட் கணக்கில் 7-6, 6-4 என தோற்கடித்து மூன்றாம் சுற்றுக்கு முன்னேறினார். அதேபோல, அமெரிக்காவின் மடிசன் கீஸ், செர்பியாவின் டானிலோவிச்சை 6-4, 6-2 என்ற கணக்கில் வீழ்த்தி தன்னுடைய தொடர்ச்சியான ஆட்டத்தைக் காட்டினார்.
மற்றொரு பெண்கள் போட்டியில், இளம்பெண் வீராங்கனை கோகோ காப் எதிர்பார்க்கப்படாத வகையில் உக்ரைனின் டயானா யாஸ்டிரெம்ஸ்காவிடம் 6-7, 1-6 என தோல்வியடைந்து முதல் சுற்றிலேயே வெளியேறினார். இது ரசிகர்களிடம் அதிர்ச்சியை ஏற்படுத்தியது. ஆண்கள் ஒற்றையர் பிரிவில் நடப்பு சாம்பியனும், உலகின் முன்னணி வீரருமான கார்லஸ் அல்காரஸ், பிரிட்டனின் ஆலிவர் டார்வெட்டை 6-1, 6-4, 6-4 என நேர்செட்டில் வீழ்த்தி தனது தரத்தை நிரூபித்தார்.
மேலும், ஜோகோவிச் தனது அனுபவத்தால் இன்னொரு சாதனையை புரிந்தார். 2005 முதல் இன்றுவரை விம்பிள்டனில் கலந்துகொண்ட அனைத்து முதல் சுற்று ஆட்டங்களிலும் வெற்றி பெற்றிருப்பது குறிப்பிடத்தக்கது. அவர் இந்த முறை பிரான்சின் அலெக்சாண்ட்ரி முல்லரை 6-1, 6-7, 6-2, 6-2 என்ற செட்களில் தோற்கடித்தார். எனினும், ஜெர்மனியின் அலெக்சாண்டர் ஸ்வெரேவ், பிரான்சின் ஆர்தர் ரின்டெர்க்னெச்சிடம் கடுமையாக போராடி 6-7, 7-6, 3-6, 7-6, 4-6 என தோல்வியடைந்து வெளியேறினார்.
இந்திய ரசிகர்களுக்கு மகிழ்ச்சி தரும் வகையில், ஆண்கள் இரட்டையர் பிரிவில் யூகி பாம்ப்ரி மற்றும் ராபர்ட் காலோவே ஜோடி, முதல் சுற்றில் 7-6, 6-4 என வெற்றி பெற்று அடுத்த சுற்றுக்கு முன்னேறியது. தொடரம் சுவாரஸ்யமாய் போய்க்கொண்டிருக்க, மீதமுள்ள சுற்றுகள் மேலும் கடுமையான போட்டிகளை அளிக்கும் என எதிர்பார்க்கப்படுகிறது.
